Ministri i Shëndetësisë, Arben Vitia, dhe kryetari i Komunës së Ferizajt, Agim Aliu kanë nënshkruar plotësim ndryshimin e Memorandumit të Bashkëpunimit për ndërtimin e Qendrës Kryesore të Mjekësisë Familjare (QKMF) në komunën e Ferizajt.

Vlera totale e ndërtimit është 2 milionë e 250 mijë euro, ka njoftuar Ministria e Shëndetësisë.

“Ministria e Shëndetësisë do të ndajë për këtë projekt 2 milionë e 25 mijë euro (90%), ndërsa Komuna e Ferizajt do të participojë me 225 mijë euro apo 10% të vlerës totale, si dhe merr përsipër koston shtesë në rast të tejkalimit të buxhetit të planifikuar”, është theksuar në njoftim.

Ministri Arben Vitia ka thënë se ndërtimi i QKMF-së është në funksion të një infrastrukture moderne me synimin që të ofrojë shërbime sa më cilësore për qytetarët e komunës Ferizajt.

"Ngaqë në të kaluarën janë identifikuar probleme serioze në zbatimin e kontratës gjatë ndërtimit të spitalit të Ferizajt, bashkërisht si institucione jemi angazhuar që mos të përsëriten pengesat teknike në rastin e ndërtimit të QKMF-së”, ka thënë ai.

Në komunikatë është theksuar se kryetari i Komunës së Ferizajt, Agim Aliu, ka thënë se regjioni i Ferizajt ofron shërbime për një numër të madh të popullatës, duke përfshirë edhe komunat tjera përreth.