Në mungesë të votave ka dështuar të kalojë draftligji për regjistrin e pronarëve përfitues, në Komisionin për Ekonomi, Industri, Ndërmarrësi dhe Tregti ku po raporton ministrja Rozeta Hajdari.

Sipas Hajdarit, miratimi i këtij projektligji do të mundësonte rregullimin e një fushe tejet të rëndësishme në një instrument të vetëm ligjor.

Deputetja nga radhët e LDK-së, Valentina Bunjaku tha se kjo qeveri duke munduar të kontrollojë çdo gjë, po bie ndesh me ligjet.

Këtë e ka kundërshtuar ministrja Hajdari. Sipas saj kjo qeveri është duke punuar me parimet e transparencës dhe llogaridhënies.

Ndërsa, deputetja Bunjaku ja ktheu duke thënë se për transparencë mund të marrë pjesë në komisionin hetimor nga ora 13:00, duke shtuar se ministrja Hajdari po mundohet t’i ikë temës.

Në këtë komision pritet të shqyrtohet edhe projekt-rezoluta për raportin vjetor të ZRRE-së për vitin 2022, dhe ku do të raportojë ministrja Rozeta Hajdari, për nivelin e zbatimit të Ligjit për tregti me jashtë.