Në Ditën Ndërkombëtarë të Pyjeve në Parkun Nacional “Blinaja”, u mblodhën përfaqësues të lartë shtetëror dhe ndërkombëtar të cilët bënë thirrje për mbrojtje të pyjeve nga shkatërrimi dhe veçanërisht u tha se duhet të luftohet prerja ilegale e pyjeve dhe hedhja e mbeturinave.

Presidentja e Republikës së Kosovës, Vjosa Osmani tha se parku nacional si “Blinaja”, është arsyeja që duhet mobilizim institucional por edhe shoqërore për ruajtjen e pyjeve në vendin tonë.

Derisa u shpreh se pyjet janë mushkëritë e së ardhshme, shefja e shtetit paraqiti si shqetësim prerjet ilegale të pyjeve, si dhe mbeturinat që po hedhet në natyrë.

E për këtë ajo kërkoi reagim shoqëror dhe institucional.

“Pyjet tona përbëjnë 41% të territorit të gjithë vendit në bazë të një hulumtimi të pavarur të realizuar vjet bazuar në imazhet  satelitore të 20 viteve të fundit ne kuptojmë se i kem humbur 7 mijë e 618 hektar pyje, sipas po të njëjtit hulumtim kjo është e barabartë me humbjen e një fushe e gjysmë futbolli e hapësira pyjore çdo ditë që nga viti 2000. Një situatë e tillë është tejet shqetësuese dhe e dhimbshme, prerjet e paligjshme dhe së bashku me zjarret dhe keqmenaxhimi u pyjeve kanë qenë ndër faktorët kryesor që kanë ndikuar në këtë drejtim…..03’41 Të flas për nivelin e mbeturinave  në pyje dua të potencoj që kjo praktikë duhet të ndalohet menjëherë nuk mund ta shijojmë natyrën, pyjet dhe bukuritë dhe të marrim më të mirën e tyre e të lëmë në anën tjetër pas mbeturinat në këmbim. Pamje të hapësirave të ngulfatur nga mbeturinat i hasim në çdo ecje dhe dalje në natyrë kjo është e pafalshme  prandaj apeloj tek individët dhe të gjitha  institucionet për punë sistematike në këtë drejtim dhe për një vetëdijesim dhe përgjegjësi të lartë“, theksoi Osmani.

E ministri i Bujqësisë, Pylltarisë dhe Zhvillimit Rural, Faton Peci u shpreh tashmë kanë siguruar politika të duhura për ruajtjen e pyjeve si pasuri kombëtare të Kosovës.

Ai tha se krahas hartimit të strategjinë nacionale për pyje 2022-2030, tashmë në Qeveri ka kaluar edhe Ligji për Pyjet e Kosovës. 

“Sot shënojmë këtë ditë me sukses të shumta sepse deri tani kemi krijuar politika të duhura në të mirë të ruajtjes së pyjeve  si pasuri kombëtare e Kosovës. Që nga marrja e drejtimit të ministrisë të Bujqësisë kemi arritur që ta hartojmë strategjinë nacionale për pyjet 2022-2030 e cila adreson politikat kryesore dhe paraqet qartë vizionin se cilët do jenë hapat institucional në 10 vjeçarinë e ardhshëm. Kemi avancuar legjislacionin duke miratuar në Qeveri Ligjin për Pyjet e Kosovës jemi në proces të hartimit të udhëzimit administrativ që rregullojnë çështjet e mbrojtjes së pyjeve dhe shfrytëzimin e ligjshëm të masës drurose”, tha ai.

Shefi i Zyrës së Bashkimit Evropian në Kosovë, Tomas Szunyog u shpreh se ruajtja e pyjeve ndikon në zhvillim të qëndrueshëm ekonomik por edhe në ruajte të biodiversitetit.

Szunyog u tha se tashmë BE ka ndarë fonde për Kosovën për të mbështetur aspektin ligjor por edhe menaxhimit më të mirë të pyjeve.

Shefi i Zyrës së BE-së e ka përshëndetur edhe miratimin e Ligjit të Pyjeve, për çka tha se institucionet e Kosovës kanë treguar përkushtimin për të punuar në sektorin e pylltarisë.

“BE mbështetet ruajtjen dhe menaxhimin e qëndrueshëm të pyjeve jo vetëm tek shtetet anëtare por në gjithë Evropën dhe gjithën botën. Në këtë drejtim së fundmi BE ka aprovuar 1.8 biliardë euro  për të financuar  veprimet drejtë menaxhimit të qëndrueshëm të pyjeve  kjo është në kuadër edhe të programit  të ambasadës të Suedisë dhe ministrisë kosovare të Bujqësisë...Mbështetja që i ofrohet Kosovës nga BE dhe donatorët tjerë në kuadër të programit të përmendur kontribuon në ndërtimin  e kapaciteteve të kornizës ligjore dhe vetëdijesimin për ta shndërruar këtë qëllim në realitet. Rezultatet e pritura përfshijnë e efikasitetin e rritur të menaxhimit të pyjeve përmes një qasje shumë qëllimore duke zbatua rregullat shumë relevante dhe duke krijuar zinxhir të ndjeshëm ndaj vlerave të gjinisë për të zbutur varfërinë“, theksoi shefi i Zyrës së BE-së në Kosovë.

Shefi i Misionit të EULEX-it, Lars Gunnar Wigemark u shpreh se prerja ilegale në Kosovë duhet të luftohet sa më shpejt.

Ëigemark theksoi se sot për Agjencinë për Mbrojtje të Pyjeve kanë dhënë një donacion.

“Prerja ilegale dhe siç tha edhe Tomas Ligji i ri për Pyjet që është miratuar së fundmi me që rast dua ta falënderoj Kuvendin që e ka miratuar kaq shpejt kjo është shumë e rëndësishme. Çfarë përpiqemi  të bëjmë ne si mision ne i monitorojmë krimet mjedisore i monitorojmë seancat gjyqësore dhe gjykimet  lidhur me krimet mjedisore në përgjithësi dhe prirja ilegale është një krim  i kësaj natyre dhe unë personalisht besoj që prerja e paligjshme është diçka kundër secilës  duhet ë punojmë të gjithë dhe ta ndalojmë në Kosovë. Për fat të keq  siç keni mundur ta vëreni gjatë hyrjes në këtë park është një rrethoj rreth tij, nuk duhet të ketë nevojë që të ketë rrethoja rreth pyjeve askund. Diçka tjetër që po e bëjmë ne si mision sot në mëngjes para se të arrinim të gjithë ne dhamë një donacion të disa prej pajisjeve tona një automjet që do përdore dhe pajisjet IT për drejtorinë të Agjencisë Pyjore”, deklaroi shefi i Misionit të EULEX-it.

Kryetari i komunës së Lipjanit, Imri Ahmeti  u shpreh se parku nacional “Blinaja”, është  rezervati i vetëm  në Kosovë ku kultivohen dhe ruhen shtazët e ndryshme të egra.

Sipas tij, vëmendja karshi kësaj pasurie nuk ka qenë e madhe ndër vite, prandaj kërkoi më shumë përkushtim për këtë park. Kryetari i Lipjanit madje kërkoi që të lejohen edhe vizitat e qytetarëve në një ditë të javës.

“Ajo që dua të konstatojmë të gjithë së bashku nuk kemi bërë mjaftueshëm për të qenë Akoma më atraktiv ky park, uroj që këtu e tutje të ndërmarrim veprime më të mira edhe ne si komunë por edhe institucionet tjera qendrore dhe si shoqëri në tërësi duket që vëmendjen nuk  e kemi pasur qind për qind të përkushtuar ndaj pyjeve dhe kjo është më se e domosdoshme që këtu e tutje ta kemi  në agjendat tona institucionale qoftë lokale dhe qendrore ruajtjen dhe kultivimin e mëtejshëm të pyjeve në nivel vendi”, tha Ahmeti.

Në këtë aktivitet për shënimin e Ditës Ndërkombëtare të Pyjeve morën pjesë edhe përfaqësues nga Kombet e Bashkuara, ambasadorja e Suedisë në Kosovë, Karin Hernmarck Ahliny dhe përfaqësues të tjerë nga FAO.

E në shënim të kësaj dite u mundësua edhe bashkëbisedim me disa nxënës të një shkolle të komunës së Lipjanit. /B.Ibishi/