NATO dënon vendimet e liderëve të Federatës Ruse dhe Koresë Veriore për të zgjeruar në mënyrë të rrezikshme agresionin e Rusisë kundër Ukrainës, duke thënë se thellimi i bashkëpunimit ushtarak Rusi-Kore Veriore ndikon në sigurinë euro-atlantike, me implikime edhe për Indo-Paqësorin.

Në deklaratë thuhet se përveç mbështetjes për përpjekjet luftarake të Rusisë përmes ofrimit të miliona municioneve dhe raketave balistike, mijëra trupa luftarake të dislokuara nga Koreja Veriore përbën një zgjerim të rrezikshëm të mbështetjes së saj të vazhdueshme për agresionin rus ndaj Ukrainës.

NATO përkujton se rritja e bashkëpunimit ushtarak midis Rusisë dhe Koresë Veriore paraqet shkelje të rezolutave të shumta të Këshillit të Sigurimit të OKB-së.

“Ne i bëjmë thirrje Rusisë që të kthehet në përputhje me këto rezoluta dhe të mbajë detyrimet e saj ndërkombëtare. Ne u bëjmë thirrje të gjitha vendeve që të mos ofrojnë asnjë lloj ndihme ndaj agresionit të Rusisë dhe dënojmë të gjithë ata që po lehtësojnë dhe në këtë mënyrë po zgjasin luftën e paligjshme të Rusisë kundër Ukrainës”, thuhet në deklaratë.

NATO paralajmëron se do të vazhdojë të punojë me partnerët e saj, veçanërisht në Indo-Paqësorin, për të promovuar paqen dhe për të parandaluar Rusinë që të minojë stabilitetin rajonal dhe global.

“Aleatët vazhdojnë të rrisin parandalimin dhe mbrojtjen e NATO-s kundër të gjitha kërcënimeve dhe sfidave, në të gjitha fushat dhe në drejtime të shumta strategjike në të gjithë zonën euro-atlantike. Aleatët mbeten të vendosur si kurrë më parë në mbështetjen e Ukrainës dhe vazhdojnë të rrisin ndihmën jetike politike, ushtarake, financiare, ekonomike dhe humanitare ndërsa Ukraina ushtron të drejtën e saj për vetëmbrojtje. Aleatët janë të vendosur të mbështesin Ukrainën në ndërtimin e një force të aftë për të mposhtur agresionin rus, në përputhje me premtimin për ndihmë afatgjatë të sigurisë për Ukrainën”, përfundon deklarata.