Në Kuvendin e Kosovës po vazhdon debati për gjendjen në sektorin e shëndetësisë. Deputetë nga partitë në opozitë kanë kritikuar kabinetin qeveritar për mungesë në këtë seancë, meqë asnjë nga ministrat nuk ishte i pranishëm.

Deputetja e Partisë Demokratike të Kosovës, Ganimete Musliu ka thënë se qeveria ka humbur, derisa fjalimin e ka përcjellë me humor duke e ftuar ish ministrin e Brendshëm Agim Veliun, që bashkë të dalin dhe ta kërkojnë qeverinë.

Ndërsa deputeti i Lidhjes Demokratike të Kosovës, Agim Veliu ka thënë se qeverinë nuk mund ta kërkojnë vetëm në Shtetet e Bashkuara të Amerikës.

“E nderuara deputete Musliu edhe atëherë kur ju keni menduar që kam qenë i humbur, nuk kam qenë i humbur, por pikërisht kam qenë duke u marrë me këta që sot po merreni edhe ju. Kurse sa i përket çështjes së dytë që e ngritët, unë besoj që mund të të ndihmoj ta gjejmë qeverinë sepse e kemi lehtë t’i lypim sepse në Shtetet e Bashkuara të Amerikës nuk kemi nevojë me i kërku”, ka thënë Veliu.

“Duke e ditë efikasitetin tuaj në punë dhe përgjegjësi që ke, kërkova ndihmën tënde me i lyp sepse vërtetë këta kanë humbur dhe thonë çka humb mos u gjetë”, ka thënë Musliu./G. Kadrija