Ministri i Financave, Hekuran Murati, u ka bërë sot thirrje qytetarëve që t’i bashkohen procesit të regjistrimit të popullsisë deri në përfundimin e të cilit kanë mbetur vetëm edhe gjashtë ditë. Ai ka thënë se përmes regjistrimit do të dihet saktë edhe numri i pensionistëve në Kosovë, fëmijëve nën 16-vjeç, dhe të dhëna tjera demografike.

“Pensionet, shtesat e fëmijëve, politikat sociale, buxhetet komunale e shumë vendime e politika tjera do të varen nga ky regjistrim i popullsisë. Nëse nuk regjistroheni, praktikisht nuk do të ekzistoni në statistikat e shtetit. Prandaj është e domosdoshme që secili prej nesh të regjistrohet në mënyrë që të kemi të dhëna të sakta dhe të mund të bëjmë politika më të mira. Kushdo që ende nuk është regjistruar, duhet ta bëjë këtë. Regjistrimi i popullsisë do të vazhdojë edhe javën në vijim, deri më 17 maj”, ka shkruar Murati në Facebook.