Muja: Mitrovica e shpërblen punën e Albin Kurtit
Drejtat Autoriale
Lexohet për: 4 min.
Dëgjoje me zë...
Muja: Mitrovica e shpërblen punën e Albin Kurtit
Kryetari i degës së Lëvizjes Vetëvendosje në Mitrovicë, Armend Muja, tha se sipas numërimit të raportimeve nga terreni dhe qendrat e votimit, partia e tij ka siguruar rreth 60 për qind të votave në komunën e Mitrovicës, ndërsa pret që rezultati të rritet në 62-63 për qind pas numërimit të votave nga diaspora.
“Sapo kemi përfunduar numërimin e raportimeve nga terreni, nga qendrat tona të votimit. Lëvizja Vetëvendosje këtu në Mitrovicë, pas numërimit të votave brenda vendit, i ka diku 60% të votave. Dhe po vazhdojmë numërimin e votave nga diaspora për të arritur një rezultat që ne e presim diku në 62-63%.
Është një rezultat bukur bindës. Vazhdon tradita që Mitrovica e shpërblen edhe e njeh punën e kryeministrit të tashëm dhe të ardhshëm, Albin Kurti”, tha Muja.
I pyetur nga gazetarët nëse ky rezultat mund të konsiderohet si debakël për Bedri Hamzën dhe Vjosa Osmanin, duke qenë se të dy vijnë nga Mitrovica, Muja tha se nuk do ta klasifikonte në atë mënyrë, por theksoi se bartësit e listave të PDK-së dhe LDK-së kanë qenë pikërisht nga ky qytet.
“Po shikoni, unë besoj që në politikë nuk kisha, nuk kisha klasifikuar ashtu, por e vërtetë është që janë sfida kryesore që ka qenë, që bartësit e listës si nga PDK-ja, ashtu edhe nga LDK-ja kanë qenë pikërisht nga ky qytet. Por, ja që Mitrovica nuk ka dashur me u kthye mbrapsht, sepse ka ekzistuar një rrezik real që të kthehemi mbrapsht dhe për ne opsioni i kthimit mbrapsht ka qenë i frikshëm.
Edhe siç duket Mitrovica ka vendosur që të ecë tutje dhe është mirë për Kosovën që Lëvizja Vetëvendosje, e vetme, ka fituar një rezultat që unë do ta konsideroja bindës dhe mundësia për ta shantazhuar Lëvizjen Vetëvendosje është bukur e kufizuar tash. Unë besoj që ne duhet të jemi të hapur të diskutojmë me të gjitha palët, të gjitha palët, sidomos tek pakicat nga komunitetet, por e rëndësishme është që për Mitrovicën është një lajm shumë i mirë”, tha ai.
Duke sqaruar shprehjen “kthim mbrapsht”, Muja tha se ajo lidhet me mënyrën e qeverisjeve të mëhershme në nivel vendi dhe ndikimin e tyre në Mitrovicë.
“Kthimin mbrapsht… Mitrovica e ka parë kthimin mbrapsht me subjektet politike të cilat kanë qenë në opozitë, ky ka qenë kthimi mbrapsht. Rreziku i kthimit mbrapsht ka qenë me partitë opozitare që kanë qeverisur gjatë Kosovën, dhe e dimë mirë në Mitrovicë se si kanë qeverisur dhe pasojat që i ka sjellë kjo për Mitrovicën.”
Ai shtoi se qeverisja aktuale ka sjellë, sipas tij, një qasje tjetër në zhvillimet në veri dhe në qeverisjen e vendit.
“Ne na është ofruar një perspektivë tjetër me kryeministrin Kurti, kanë qenë bukur vendime të guximshme, zoti Kurti e ka udhëhequr një transformim të madh në Mitrovicë, i cili ka parë rikthimin e lirisë, rikthimin e sovranitetit në veri dhe siç duket Mitrovica edhe këtë herë e ka dhënë një mesazh të qartë që nuk dëshiron me u kthye mbrapsht.”
Në fund, Muja tha se mesazhi i votuesve është orientimi drejt zhvillimit ekonomik dhe integrimit evropian.
“Dhe dëshiron të ecë tutje: sovranitet, liri, dhe mbi të gjitha, tash e tutje përqendrim tek zhvillimi ekonomik dhe rritja e standardit të jetesës, integrimi evropian. Unë besoj që këto janë perspektivat që ne i detyrohemi edhe gjeneratave të reja. Dëshirojmë pra: integrim evropian, zhvillim ekonomik, edhe politikat e tjera shoqërore, sociale, sidomos tek arsimi dhe shëndetësia. Unë kështu e lexoj verdiktin e popullit të Mitrovicës”, tha Muja.
/Kosovapress/
Lajmi i plotë ëshë në sistemin me parapagim.
Abonohu për ti shfryëzuar shërbimet KosovaPress-it.
