Jose Mourinho ka deklaruar me bindje se kualifikimi i Benfica-s në Ligën e Kampionëve, nuk do ta ndikojë vendimin e tij në lidhje me një transferim të mundshëm, te Real Madridi.

Trajneri 63-vjeçar raportohet gjerësisht si një kandidat kryesor për të zëvendësuar Alvaro Arbeloan në Bernabeu, mes një sezoni sfidues për gjigantët spanjollë.

Mourinho, i cili mori drejtimin e Benfica-s në shtator, ka mbikëqyrur një seri të pamposhtur në ligën portugeze me vetëm një ndeshje të mbetur për t’u luajtur.

Megjithatë, një barazim kundër Bragës të hënën në mbrëmje e ka lënë ekipin e tij dy pikë pas vendit të dytë, Sporting Lisbon, përpara ndeshjes kritike të së shtunës me Estorilin.

Duke iu drejtuar spekulimeve në konferencën e tij për shtyp pas ndeshjes, Mourinho deklaroi se kualifikimi i Benfica-s në Ligën e Kampionëve nuk do ta ndikojë vendimin e tij për të ardhmen.

“Ju po flisni për Real Madridin, unë nuk po flas për Real Madridin. Po flas për Benfikën, dhe puna që kemi bërë nuk do të ndryshojë sepse jemi të dytët ose të tretët. Kjo nuk është ajo që do të ndikojë në të ardhmen time. Padyshim, Benfica dëshiron të luajë në Ligën e Kampionëve, dhe unë si trajner gjithashtu, por nuk ka asnjë ndikim” – tha Mourinho.

Sezoni aktual ka qenë veçanërisht i vështirë për Los Blancos, duke kulmuar me humbjen e tyre ndaj Barcelonës të dielën në mbrëmje, e cila vulosi titullin e ligës për rivalët e tyre të ashpër, së bashku me trazirat e publikuara gjerësisht në dhomat e zhveshjes. Real Madrid u eliminua gjithashtu nga Liga e Kampionëve në fazën çerekfinale për të dytin sezon radhazi.

Duke u eliminuar nga Arsenali sezonin e kaluar, Real Madridi dështoi kundër Bayern Mynih këtë herë, duke pësuar një humbje të përgjithshme 6-4.
15 herë fituesit e Kupës së Evropës pritet ta përfundojnë sezonin pa trofe dhe klubi pritet të emërojë një trajner të ri këtë verë, me Mourinhon që është ende shumë i pëlqyer nga presidenti Florentino Perez për më shumë se një dekadë pasi u largua nga klubi për t’u ribashkuar me Chelsean.

Mourinho më parë e ka drejtuar Real Madridin nga viti 2010 deri në vitin 2013, duke siguruar një titull lige dhe Kupën e Mbretit.

KosovaPress