Organizata e Veteranëve të Luftës ka reaguar pas miratimit të Projektligjit që përcakton pagën minimale, e i cili nuk përfshinë edhe rritjen e pensioneve për veteranët. Ndërkohë për të enjten ka paralajmëruar protestë gjithëpopullore.

Sipas OVL të UÇK-së, deputetët vepruan kundërligjshëm e kundër aktgjykimit të Gjykatës Kushtetuese.

“Kuvendi i turpit të Kosovës, deputetët e pushtetit (me ndonjë përjashtim) së bashku me pakicat, të rrethuar me forca policore, miratuan në lexim të parë Projektligjin për ndryshimin e ligjeve, me anë të të cilit u përjashtuan veteranët e luftës së UÇK-së edhe nga paga minimale... Për shkak të këtij turpi të deputetëve të Kuvendit, Organizatat e dala nga Lufta e UÇK-së, ftojnë protestë gjithëpopullore para institucioneve (Kuvend e Qeveri) me datën 16 qershor 2022 prej orës 09:30”, thuhet në reagimin e OVL të UÇK-së.

Sipas tyre, dalja sa më masive në protestë, nënkupton mbrojtje të institucionit më të lartë, luftës së lavdishme të Ushtrisë Çlirimtare të Kosovës dhe kategorive të saj.

“Ata vepruan sot edhe kundërligjshëm e kundër aktgjykimit të Gjykatës Kushtetuese, pra kundër ligjit 05/L-141 i cili thotë në nenin 16 A pika 3.1. ‘Deri në kategorizimin përfundimtar të listës së  Veteranit Luftëtar të UÇK-së, skema pensionale zbatohet siç është paraparë me ligjin bazik’, pra ligji bazik është ai që i lidhë veteranët me pagën minimale”, thuhet po aty.

https://kosovapress.com/admin/%e2%80%8bmiratohet-ne-parim-projektligji-qe-percakton-pagen-minimale/