Ministri i Sportit dhe Rinisë, Blerim Gashani, ka pritur në një takim zyrtar kryetarin e Federatës së Sporteve Universitare të Kosovës (FSUK), Musa Selimi, për të diskutuar mbi strategjitë e avancimit të sportit në nivel akademik.

Gjatë bashkëbisedimit, palët vunë theksin te sporti universitar si një shtyllë jetike jo vetëm për shëndetin fizik të studentëve, por edhe si një mjet efikas për ndërtimin e disiplinës, bashkëpunimit dhe identitetit te rinia kosovare.

Ministri Gashani vlerësoi lart angazhimin e FSUK-së në organizimin e aktiviteteve të deritanishme, duke rikonfirmuar mbështetjen e palëkundur të institucioneve për iniciativat që rrisin cilësinë e sportit dhe fuqizojnë pozitën e rinisë.