Matteo Guendouzi thuhet se është i gatshëm të ribashkohet me ish-trajnerin e tij të Arsenalit, Unai Emery në Aston Villa, duke pasur parasysh se ai nuk është në marrëdhënie të mira me trajnerin e Lazios, Igor Tudor.

Lazio emëroi Tudor në mars për të zëvendësuar Maurizio Sarrin, por ish-mbrojtësi kroat ka mbajtur disa takime me drejtorët e Lazios dhe presidentin Claudio Lotito gjatë ditëve të fundit për të diskutuar strategjinë e transferimeve të verës, raporton KosovaPress.

“Sportitalia” dhe “Corriere dello Sport” pretendojnë se Lazio dhe Tudor kanë pikëpamje të ndryshme për nënshkrimet e reja. Trajneri ka kërkuar disa përforcime, ndërsa Lazio pret që ai të punojë me futbollistët që tashmë janë në skuadër.

Kjo, në letër, do të thotë që Lazio dëshiron ta mbajë Guendouzin përtej verës, por ish-mesfushori i Arsenalit nuk është në marrëdhënie të mira me Tudorin, kështu që ai do të kërkojë të largohet nëse kroati mbetet në krye.

Guendouzi dhe Tudor kishin pasur tashmë një përplasje në Olympique Marseille dhe marrëdhënia e tyre nuk është përmirësuar në Romë.

Agjentët e mesfushorit e zbuluan interesimin e Aston Villas javën e kaluar. Tani thuhet se mesfushori francez po shtyn t'i bashkohet skuadrës së Premier Ligës dhe të luajë përsëri nën urdhrat e Emeryt.

“Corriere dello Sport” pretendon se Lazio pret një ofertë nga Aston Villa midis 25 dhe 30 milionë eurosh për Guendouzin në ditët në vijim.