Me trajneri e ri, Qëndrim Kida, të ardhur pas largimit të Senad Alirifës, Malisheva po synon që në fund të sezonit të sigurojë daljen në garat evropiane dhe deri më tani është në rrugën e duhur për ta arritur këtë objektiv.

Këtë synim e pranon hapur edhe vet trajneri Kida i cili për KosovaPress ka thënë se skuadra do të marr ndeshjet një nga një me synimin për të grumbulluar sa më shumë pikë dhe pastaj të bëhen vlerësimet në kohën e duhur.

Për ta arritur këtë qëllim, Kida thotë se skuadra ka nevojë për përforcime në disa pozicione të cila mund të vijnë në afatin kalimtar të janarit.

Që Malisheva ka kualitete për ta synuar Evropën e thotë edhe supertalenti i skuadrës, Drilon Hazrollaj. Ai thotë se lojtarët po japin maksimumin për ta arritur këtë objektiv.

Mbi të ardhmen e tij, Hazrollaj deklaroi se është i fokusuar plotësisht te Malisheva, por pranon që e ardhmja mund te sjellë ndryshime.

Ndërkohë, kapiteni Dren Kryeziu shprehet i bindur se skuadra tashmë po luan për vitin e tretë në Superligë dhe se përvoja e fituar është një armë e fortë për të arritur synime më të mëdha në këtë edicion.

Ndryshe, skuadra e Malishevës dy javë më p[arë është kthyer të luajë para tifozëve të saj në stadiumin “Liman Gegaj” pas intervenimeve që janë bërë në fushën e gjelbër  si dhe në ndërtimin e tribunës së re për tifozët.