Organizata “Shqiptaria” ka bërë me dije se më 6 maj, në Prishtinë, do të organizojë, në bashkëpunim me partnerët e saj, një manifestim me rastin e ditëlindjes së heroit kombëtar Gjergj Kastrioti Skënderbeu.

Në këtë ngjarje pritet të marrin pjesë delegacione arbëreshe nga Italia, përfaqësues të komunave arbëreshe ku përfshihen grupe nga Kalabria dhe San Marzano, i njohur si “Katundi i Ni Zemra” si dhe pasardhësi I familjes Kastrioti - Loris Castriota.

Po ashtu, pjesë e manifestimit do të jenë përfaqësues të komunave arbëreshe nga Piana degli Albanesi, Ururi, San Marzano di San Giuseppe dhe Chieuti.

Organizatorët, sipas një njoftimi që kanë bërë në rrjete sociale, theksojnë se ardhja e këtyre delegacioneve “është dëshmi e gjallë se fryma arbërore dhe trashëgimia e Gjergj Kastrioti Skënderbeut vazhdojnë të jetojnë fuqishëm ndër breza”.

Qytetarët nga të gjitha trojet shqiptare janë ftuar të marrin pjesë në këtë manifestim, për të nderuar, siç thuhet “historinë, identitetin dhe trashëgiminë kombëtare”.

“Mirë se vini vëllezër arbëreshë”, thuhet në njoftimin e organizatorëve.

Kjo është hera e tretë që Organizata “Shqiptaria” organizohen festimin e ditëlindjes së Skënderbeut, në Prishtinë.

Pas dy edicioneve të para, ngjarja ka marrë përmasa pothuajse të një feste kombëtare dhe synohet të kthehet në traditë, duke pasur pjesëmarrje të lartë si për nga niveli i mysafirëve speciale,  ashtu edhe për nga numri i vizitorëve.

Gjergj Kastrioti-Skënderbeu u lind më 6 maj 1405, në familjen fisnike të Gjon Kastriotit, nga Dibra.

Si fëmijë ai u mor peng nga sulltan Murati dhe luftoi për Perandorinë Otomane si gjeneral deri në vitin 1443, kur u rikthye në Krujë. Në vit më vonë, ai mblodhi të gjithë princërit shqiptarë në Lidhjen e Lezhës, ku u vendos unanimisht të luftohej për marrjen në zotërim të trojeve shqiptare kundër perandorisë otomane.

Në krye të ushtrisë shqiptare, pas triumfit të parë në betejën e Torviollit, Skënderbeu do të korrte 22 fitore të mëdha kundër Perandorisë Osmane. /KosovaPress/

/Kosovapress/