Procesi i verifikimit të pakove me fletëvotime të ardhura përmes postës nga votuesit jashtë Kosovës po vazhdon në Qendrën e Numërimit dhe Rezultateve (QNR), ndërsa deri më tani janë aprovuar mbi 7 mijë prej tyre.

Zëdhënësi i Komisioni Qendror të Zgjedhjeve, Valmir Elezi, nga Qendra Komunale e Numërimit në Prishtinë, bëri të ditur se deri sot janë shqyrtuar mbi 7 mijë pako të supozuara me fletëvotime. Sipas tij, 7 mijë e 153 prej tyre janë aprovuar, ndërsa 142 janë refuzuar.

Arsyeja më e shpeshtë e refuzimit të këtyre pakove, sipas Elezit është në 114 raste mungon dëftesa e regjistrimit, një dokument me të dhëna të votuesit, që votuesi i regjistruar e pranon nga KQZ-ja.

Ndërkohë bëri të ditur se në 13 Qendra Komunale të Numërimit, procesi i verifikimit dhe numërimit ka përfunduar.

“Deri më tani procesi i verifikimit dhe numërimit ka përfunduar në 13 QKN, ndërkaq numri i përgjithshëm i vendvotimeve të procesuara është 1 mijë e 379 nga 2 mijë e 498 apo më shumë se 55 përqind. Ndërkaq në të tjerat pritet që të përmbyllet gjatë ditës së sotme e mërkurë. Sa i përket aktiviteteve në QNR, është duke vazhduar procesi i vlerësimit të pakove të supozuara me fletëvotime nga votimi jashtë Kosovës, përmes postës që deri më tani janë sjellur në Kosovë. Deri më tani nga pjesa më e madhe që janë sjellë në Kosovë, procesit të vlerësimit i janë nënshtruar më shumë se 7 mijë të tilla, prej të cilave janë aprovuar 7 mijë e 153, ndërkaq janë refuzuar 142. Arsyeja më e shprehur se përse janë refuzuar këto pako është se në 114 raste mungon dëftesa e regjistrimit, një dokument me të dhëna që votuesi i regjistruar e pranon nga KQZ kur regjistrohet si votues jashtë Kosovës”, tha Elezi.

Elezi tha se në QNR po bëhet vlerësimi i pakove të supozuara me fletvotime jashtë Kosovës.

Gjithashtu tha se do bëhet edhe skanimi i listës së votuesve të përdorur në vendvotime të rregullta, listës së përdorur në votimin e personave me nevoja të veçanta dhe votimi në përfaqësi diplomatike.

“Në QNR është duke u bërë vlerësimi i pakove të supozuara me fletëvotime jashtë Kosovës. Qëllimi është për tu vërtetuar se a janë nga votuesit i regjistruar. Do bëhet edhe skanimi i listës së votuesve të përdorur në vendvotime të rregullta, i listës së përdorur në votimin e personave me nevoja të veçanta dhe votimi në përfaqësi diplomatike”, shtoi ai.

Për procesin e rinumërimit, Elezi theksoi se KQZ vendor për rinumërim deri në 10 përqind të vendvotimeve në një komunë të caktuar të cilat paraprakisht numërohen në QKN.

Qëllimi i këtij parashikimi është që të sigurohet që procesi është zhvilluar në rregull, e për çdo gjetje, Elezi tha se KQZ do ndërmarrë hapa të tjerë.

“KQZ qysh në fillim të këtij procesi zgjedhor për të trajtuar dhe adresuar çështjet problematike të cilat janë paraqitur në zgjedhjet e fundit parlamentare të dhjetorit, kishin të bënin me mos evidentimin e saktë të votave të kandidatëve për deputetë dhe disa nga QKN, ka përmirësuar rregullativën përmes aktit nënligjorë, KQZ ka plotësuar dhe ndryshuar rregulloren zgjedhore për QNR. Është paraparë që KQZ të vendos për rinumërimin deri në 10 përqind të vendvotimeve të një komune të caktuar të cilat paraprakisht numërohen në QKN. Qëllimi i këtij parashikimi nga KQZ që të bëhet deri në 10 përqind është që të sigurohet që ky proces është duke u bërë në rregull dhe vullneti i qytetarëve është duke u evidentuar me saktësi. Sipas gjetjeve KQZ do ndërmarrë hapa të tjerë”, tha ai.

/Kosovapress/