Marotta refuzon të komentojë vendimin për Acerbi (VIDEO)
Drejtori i Interit, Beppe Marotta, me mirësjellje refuzoi të komentojë vendimin për Francesco Acerbi pasi mori pjesë në një takim të FIGC sot.
Disa gazetarë pritën Marottan jashtë zyrave të FIGC në Romë të enjten pas një takimi të Këshillit Federal të FIGC, raporton KosovaPress.
Gazetarët patën kohë të bënin vetëm një pyetje përpara se Marotta të hynte me shpejtësi në një makinë që e priste. Natyrisht, bëhej fjalë për vendimin që e shpalli mbrojtësin e Interit, Acerbi të pafajshëm për abuzim racor ndaj Juan Jesus.
Marotta u përgjigj me një buzëqeshje dhe tha: "Faleminderit, por nuk kam asgjë për të thënë".
Acerbi i kishte shpëtuar një pezullimi të mundshëm prej dhjetë ndeshjesh në fillim të kësaj jave pasi autoritetet nuk gjetën prova të mjaftueshme për ta çuar çështjen më tej, por vendimi është ende një pikë e madhe bisede në Itali, ku përfshiu edhe ministrin për Sportin Andrea Abodi, i cili kritikoi vendimin e gjyqtarit sportiv të enjten.
