Maqedonci: Citova ministrin kroat për përfshirjen e Bullgarisë në marrëveshjen trilaterale
Lexohet për: 4 min.
Dëgjoje me zë...
Maqedonci: Citova ministrin kroat për përfshirjen e Bullgarisë në marrëveshjen trilaterale
21/04/2025 - 09:38
Linku u kopjua
Ministri në detyrë i Mbrojtjes, Ejup Maqedonci, mohon raportimet se ka deklaruar bashkëngjitjen e Bullgarisë në marrëveshjen e mbrojtjes së Kosovës me Shqipërinë dhe Kroacinë. Derisa potencon se nuk ka pasur kontakte me këtë shtet, Maqedonci thekson se ka cituar ministrin kroat sa i përket kësaj çështjeje, raporton KosovaPress.
“Kemi një konfirmim nga Bullgaria, e cila ka diskutuar më herët me ministrin kroat për mundësinë që t’i bashkëngjitet kësaj marrëveshjeje trilaterale…”, kështu raportohet të ketë thënë Maqedonci në një intervistë për TRT Balkan në margjinat e Forumit Diplomatik të Antalyas, transmeton KosovaPress.
Ndërsa, në një intervistë për KosovaPress, ministri në detyrë i Mbrojtjes, Ejup Maqedonci thotë se më 18 mars, në ditën kur u nënshkrua marrëveshja trilaterale, kryeministri kroat ka përmendur mundësinë që shteti bullgar t’i bashkohet kësaj aleance ushtarake.
Ndërkaq, për një gjë të tillë ka reaguar ministri i Jashtëm i Bullgarisë, Georg Georgiev, duke thënë se informacionet që thonë se Bullgaria ka shprehur interesim jozyrtar për Deklaratën mbi Forcimin e Bashkëpunimit në Fushën e Mbrojtjes midis Kosovës, Kroacisë dhe Shqipërisë janë të pasakta, raporton Agjencia e lajmeve bullgare BTA.
“Unë në asnjë rast nuk kam thënë që kam pasur kontakte me Bullgarinë. Me Bullgarinë ka pasur kontakte mnistri kroat, i cili e ka një intervistë në Večernji list me datën 18 mars, ditën kur kemi nënshkruar marrëveshjen trilaterale ku thotë që [kemi një mund të themi komunikim me Bullgarinë për një bashkëngjitje të mundshme të Bullgarisë në këtë marrëveshje trilaterale]. Përndryshe, ne jemi të hapur për çdo shtet që ndanë vlera të përbashkëta me këto tri vendet tona, por edhe me interesa të përbashkëta me tri vendet tona…Unë e kam cituar vetëm ministrin kroat dhe ajo është shumë e qartë dhe intervista e ministrit kroat është me datën 18 mars mund ta shikoni dhe ta gjeni aty thënien e tij për Bullgarinë”, potencon Maqedonci, shkruan KosovaPress.
Ndryshe, një muaj më parë, Kosova, Shqipëria dhe Kroacia kanë nënshkruar Deklaratën trilaterale për bashkëpunim në fushën e mbrojtjes. Nënshkrimi u bë në Tiranë nga ministri i Mbrojtjes i Shqipërisë, Pirro Vengu, ai i Kosovës Ejup Maqedonci dhe ministri nga Kroacia, Ivan Anushiq.
“Serbia vazhdon t’i mbështesë grupet terroriste që cenojnë sigurinë e vendit tonë”
Përveç kësaj, në intervistën për KosovaPress, Maqedonci komenton deklarimet e Serbisë se nuk ka paqe në Kosovë.
Ai thotë se Serbia vazhdon të jetë burimi i jostabilitetit dhe cenimit të sigurisë në regjionin e Ballkanit Perëndimor.
Maqedonci potencon se Serbia po promovon politikën hegjemoniste në raport me fqinjët që kufizohet, përshirë edhe Kosovën.
Ai shton se ky shtet ende po mbështetë grupe terroriste të cilat vazhdimisht kanë cenuar sigurinë e vendit tonë.
Para pak ditësh, kryeministri i ri i Serbisë, Gjuro Matsut, derisa lexoi programin e tij qeverisës në parlament, ka thënë se një nga sfidat më të mëdha të qeverisë së re do të jetë e ashtuquajtura mbrojtje e sovranitetit dhe integritetit territorial në Kosovë.
Sipas tij, paqja në Kosovë është e pamundur pa drejtësi, teksa pretendoi se do të pranojë që dialogu në mes të dy shteteve të zhvillohet i hapur, me ndershmëri dhe pa presion./Z.Zeneli
