Kryetari i Kuvendit të Malit të Zi, Andrija Mandiq, ka deklaruar se pas vendimit për t'ia ndaluar hyrjen në Kosovë kryetarit të Komunës së Nikshiqit, Marko Kovaçeviq, dhe kryetares së Kuvendit Komunal të Beranës, Vidi Ivanoviq, qëndron kryeministri i Kosovës, Albin Kurti.

Sipas një njoftimi të partisë Nova Srpska Demokratija (NSD), të cilën e udhëheq Mandiq, ai tha se edhe deputetët e partive shqiptare në Mal të Zi e kanë kuptuar se "dikush dëshiron të prishë marrëdhëniet ndërmjet politikanëve serbë dhe shqiptarë në Mal të Zi".

"Nëse ka një vend ku ekziston bashkëpunim i mirë ndërmjet politikanëve serbë dhe shqiptarë, ai është Mali i Zi. Ne po punojmë për të ardhmen e popujve tanë, por edhe të boshnjakëve dhe malazezëve", citohet të ketë thënë Mandiq gjatë seancës së Kuvendit të Malit të Zi, tw premten, raporton gazeta nga Podgorica Vijesti, transmeton KosovaPress.

Ai shtoi se synimi i përbashkët i shumicës parlamentare dhe përfaqësuesve të komuniteteve të ndryshme kombëtare është anëtarësimi i Malit të Zi në Bashkimin Evropian, duke theksuar se ekzistojnë aktorë që, sipas tij, dëshirojnë ta pengojnë këtë proces.

Kryeparlamentari malazez theksoi se Mali i Zi nuk duhet t'u përgjigjet me masa të njëjta politikanëve nga Kosova, pasi, sipas tij, nuk dëshiron që me reagime të tilla të rrezikojë paqen dhe stabilitetin në rajon.

Ai tha se u ka rekomanduar përfaqësuesve të Qeverisë së Malit të Zi që "në asnjë rrethanë" të mos ndjekin praktikën e ndalimit të hyrjes për politikanë, gazetarë apo intelektualë, përveç rasteve kur bëhet fjalë për persona me të kaluar kriminale që mund të cenojnë sigurinë e vendit.

"Dyert e këtij shteti duhet të jenë të hapura dhe ne të jemi mikpritës të mirë", deklaroi Mandiq, duke shtuar se Mali i Zi duhet të përcjellë mesazhe lirie, pajtimi dhe bashkëpunimi, si brenda vendit ashtu edhe në rajon.

KosovaPress ka pyetur te zyra e kryeministrit të Republikës së Kosovës, Albin Kurti nëse kanë ndonjë koment për atë që ka thënë Mandiq. Përgjigja eventuale do të publikohet kurdo që ajo të kthehet. /KosovaPress/