Paolo Maldini, drejtori teknik i kombëtares italiane, dhe këshilltari i tij Leonardo kanë vendosur të japin dorëheqjen nga Federata Italiane, pas përplasjeve të forta për identitetin e trajnerit të ri të Italisë.

Presidenti i ri i FIGC, Giovanni Malagò, e emëroi Maldinin si Drejtor Teknik më 11 korrik, me qëllimin për të ristrukturuar futbollin italian. Leonardo iu bashkua si këshilltar.

Kriza nisi kur federata dështoi të bindë Carlo Ancelottin dhe Pep Guardiolën për të marrë pankinën, duke kaluar më pas te Andrea Pirlo.

Federata e ka refuzuar emërimin e Pirlos pasi u zbulua se ai mban pozitën e ambasadorit global për kompaninë ruse të basteve "Fonbet".

Kjo ka ngritur shqetësime ligjore dhe etike, pasi promovimi i basteve është i ndaluar në Itali.

Sipas raportimeve, Malagò ka refuzuar të vazhdojë me Pirlon, përkundër mbështetjes së Maldinit dhe Leonardos për këtë opsion, duke çuar në tensione të mëdha brenda federatës.

Sky Sport Italia konfirmon se Maldini dhe Leonardo kanë marrë vendimin përfundimtar për t'u larguar, me njoftimin zyrtar që pritet në orët në vijim.

Kjo i jep fund mandatit të tyre vetëm pak ditë pas nisjes së projektit për rindërtimin e së ardhmes së futbollit italian.

KosovaPress