Qeveria e Malajzisë do të rinisë kërkimin për fluturimin MH370 të Malaysian Airlines, i zhdukur në mënyrë misterioze në  vitin 2014.

Ministri i Transportit, Anthony Loke, tha se qeveria kishte "pajtuar në parim" me një propozim të kompanisë amerikane të robotikës dhe eksplorimit të thellë të oqeaneve Ocean Infinity për të vazhduar kërkimin për avionin e zhdukur.

Detajet përfundimtare të marrëveshjes do të finalizohen në fillim të vitit të ardhshëm. Ocean Infinity nuk do të kompensohet nëse kërkimi rezulton i dështuar. Nëse gjen pjesë të rëndësishme të mbetjeve të avionit, kompania do të merr 70 milionë dollarë.

Loke thotë se kërkimi do të fokusohet në një zonë të re prej "rreth 15 mijë kilometra katrorë" në jug të Oqeanit Indian, ku mendohet se avioni është rrëzuar.

Aeroplani i Malaysia Airlines u zhduk nga radarët më 8 mars 2014, gjatë një fluturimi nga Kuala Lumpur drejt Pekinit në rrethana të pa zbardhura deri më sot, dhe kërkimi për fluturimin e humbur është bërë më i shtrenjti në historinë e aviacionit.

Në aeroplan ndodheshin 227 pasagjerë dhe 12 anëtarë të ekuipazhit, të cilët konsiderohen të gjithë të vdekur. Radarët treguan se avioni la rrugën e synuar dhe fluturoi përsëri mbi Malajzinë veriore, përpara se të kthehej mbi detin Andaman. Kontakti me aeroplanin më pas humbi.