Ish-kapiteni legjendar i Shqipërisë, Lorik Cana, ka analizuar rrugëtimin mbresëlënës të Kosovës deri në finalen e sotme, në një intervistë nga Euronews Albania, duke vënë re një transformim rrënjësor që sipas tij nisi në Basel.

Edhe pse e cilëson Turqinë si “favoriten e madhe”, Cana beson se forca e vërtetë e "Dardanëve" tashmë buron nga një vetëbesim i sapogjetur që i ka shoqëruar gjatë gjithë fazës kualifikuese.

"Pas asaj ndeshjeje ka ndërruar diçka te Kosova. Ka ndërruar jo vetëm në mënyrë taktike, por ka ndodhur diçka brenda ekipit – kanë gjetur një vetëbesim dhe një shpirt luftarak," u shpreh Cana, duke shtuar se suksesi është plotësisht i merituar pas fitoreve të mëdha në Suedi, Slloveni dhe eliminimit të Sllovakisë.

I pyetur se çfarë do t’u thoshte lojtarëve vetëm dy minuta para se të zbresin në fushë përballë Turqisë, ish-lideri i kombëtares dha një këshillë prej veterani: Kanalizimin e emocioneve.

Sonte, nën dritat e stadiumit "Fadil Vokrri", mbetet të shihet nëse ky "shpirt i ri" që diktoi Cana do të mjaftojë për të mposhtur favoritin dhe për të siguruar biletën për në Botëror.

KosovaPress