Llapi nuk e fitoi titullin, Batatina: Vështirë të luftosh me mafinë e FFK-së
Në ndeshjen e parafundit të sezonit të Superligës së Kosovës u zhvillua përballja mes Llapit dhe Ballkanit, dy skuadrave që garonin për titullin e kampionit.
Ballkani e mposhti Llapin 1:0 si mysafir, duke e siguruar titullin e kampionit në “Zahir Pajaziti”, raporton KosovaPress.
Me këtë gjë si duket nuk po pajtohet nënkryetari i Llapit, Amrush Batatina.
Batatina në “Facebook” shkroi se është e vështirë që të luftosh me të gjithë, duke filluar nga mafia e Federatës së Futbollit të Kosovës (FFK).
“Respekt për të gjithë që kontribuuat që Llapi të jetë në qendër të vëmendjes, respekt për kryetrajnerin, shtabin teknik, djelmoshat e të gjithë që janë afër klubit. Respekt për ‘Legjendat’, krenarinë e Llapit. Është problem të luftosh me të gjithë duke filluar nga mafia e federatës e te poshtë me klanin e saj. Kësaj radhe humbi Llapi por shpresoj që vitet e tjera mos të bëhet tjetër ekip kurban. Respekt për të gjithë llapjanët, ju kërkojmë falje që nuk e arritëm suksesin e shumëpritur”, shkroi Batatina në “Facebook”.
