Anëtari i Lidhjes Demokratike të Kosovës, Visar Azemi, ka dorëzuar sot në Zyrën e Rregullatorit të Energjisë (ZRRE) qindra dëshmi të manipulimit me njehsorët e energjisë elektrike, për të cilat pretendohet se po i bëhen qytetarëve të vendit, raporton KosovaPress.

Azemi deklaroi se LDK kërkon hetim të menjëhershëm të kësaj skeme të mashtrimit dhe shkarkim të bordit të ZRRE-së, sepse një bord i cili ka lejuar manipulimin me njehsorët elektrik, nuk ka kompetencë të marr vendime për ngritje të çmimit të energjisë.

Lidhja Demokratike e Kosovës po ashtu gjatë takimit me zyrtarin e ZRRE-së, kërkoi ndalimin e menjëhershëm të intervenimit të punëtorëve të KEDS-it nëpër njehsorët elektrik. Sepse kësisoj fshihen provat dhe fshirja e provave është vepër penale.

“Prandaj, qytetarët të cilët janë vjedhur nga kjo skemë e mashtrimit me njehsorët elektrik, duhet të kompensohen”, thuhet në njoftimin e LDK-së.

Ditë më parë, Lidhja Demokratike e Kosovës ka dorëzuar siç thanë dëshmi në zyrën e KEDS se njësorët elektrikë po masin gabimisht kohën.

Anëtari i Kryesisë së LDK-së, Visar Azemi pati thënë se kanë sjell dëshmi të mjaftueshme se qysh “KEDS po manipulon dhe vjedh qytetarët” duke mashtruar me kohën në njehsorët elektrikë.

/Kosovapress/