Kuvendi i Kosovës miratoi Projektligjin për sigurimin e detyrueshëm të kujdesit shëndetësor i cili ndër të tjera do të ofrojë edhe sigurimin shëndetësor pa asnjë kushtëzim për viktimat e dhunës seksuale gjatë luftës në Kosovë.

Votimi u bë me procedurë të përshpejtuar në seancën e së enjtes.

Pas kësaj ka reaguar edhe Qendra Kosovare për Rehabilitimin e të Mbijetuarve të Torturës duke thënë se kjo ishte kërkesë jetike e të mbijetuarve.

“Pas avokimit të vazhdueshëm nga QKRMT për ofrimin e shërbimeve shëndetësore pa pagesë për të mbijetuarit e dhunës seksuale, duke përfshirë takimet e vazhdueshme me ministritë përkatëse dhe deputetët e Kuvendit të Kosovës dhe letrave të shumta avokuese, sot, më 5 dhjetor 2024, në seancën plenare të Kuvendit të Kosovës u miratua Ligji për Sigurimin e Detyrueshëm të Kujdesit Shëndetësor, ku u aprovua edhe propozimi i QKRMT-së që viktimave të dhunës seksuale gjatë luftës në Kosovë t’i ofrohet sigurim shëndetësor i paguar nga shteti pa asnjë kushtëzim”, ka shkruar drejtoresha e QKRMT-së, Feride Rushiti.

Më herët të enjten, KosovaPress ka publikuar rrëfime të të mbijetuarve të dhunës gjatë luftës së fundit në Kosovë, të cilat tregojnë sfidat deri të arritja e sigurimit të shërbimeve shëndetësore.

Numri i personave të përdhunuar gjatë luftës së fundit në Kosovë nuk dihet, por raportet flasin për rreth 20.000.

Deri tani, vetëm Zoran Vukotiq është dënuar për dhunim seksual gjatë luftës së viteve 1998-1999.

Historitë e tyre nuk dihen sepse të mbijetuarit ende i druhen stigmës e paragjykimit, dhe heshtin.

Në Kosovë, që prej vitit 2014 ekziston një ligj për njohjen e statusit të tyre por deri tani vetëm rreth 2 mijë e kanë marrë atë.