Kuvendi i Kosovës të enjten, më 24 tetor do të mbajë seancë të jashtëzakonshme, me iniciativë të Lidhjes Demokratike të Kosovës dhe nënshkrimin e 43 deputetëve për të diskutuar skandalet në Korporatën Energjetike të Kosovës (KEK).

Iniciuesi i kësaj seance, shefi i Grupit parlamentar të LDK-së, Arben Gashi, thotë për KosovaPress se është e domosdoshme që Kuvendi të diskutojë skandalet në KEK dhe problemet e vazhdueshme në fushën e energjetikës.

Sipas tij, në sektorin e energjisë elektrike ka keqmenaxhim të theksuar, derisa përmend publikimin e mesazheve të koordinatores së partisë në pushtet, LVV-së, Dejona Mihali me ish-kryeshefin e KEK-ut Nagip Krasniqi.

Në anën tjetër, shefja e Grupit parlamentar të Lëvizjes Vetëvendosje Mimoza Kusari-Lila thotë për KosovaPress se nuk kanë ndonjë informacion për kërkesë për seancë të jashtëzakonshme të opozitës, derisa nuk bëri të ditur nëse shumica parlamentare do të merr pjesë në seancën e nesërme.

Thirrja e seancave të jashtëzakonshme nga opozita për monitoruesit e punës së Kuvendit po konsiderohet normale dhe e dobishme për jetën parlamentare, derisa kritikohet bojkoti i mazhorancës.

Sipas tij, seancat e jashtëzakonshme janë të vetmet që mundet t’i ftojë opozita dhe që janë të pandalshme nga pushteti.

Në anën tjetër, hulumtuesi në Institutin e Kosovës për Drejtësi(IKD), Naim Jakaj, thotë për KosovaPress se është në interes publik të mbahen seancat e jashtëzakonshme dhe të diskutohen çështjet e ngritura nga opozita.

Ai kritikon shumicën parlamentare se me bojkot të seancave të jashtëzakonshme po cenon përfaqësimin demokratik, besimin e qytetarëve, detyrave dhe përgjegjësive si deputetë të Kuvendit të Kosovës. Sipas tij, nëse mazhoranca bojkoton edhe seancën e nesërme dëmton integritetin e Kuvendit.

Jakaj si shqetësuese përmend edhe mungesën e kryetarit të Kuvendit, Glauk Konjufca në drejtimin e tri seancave të kaluara të jashtëzakonshme.

Kohëve të fundit janë publikuar mesazhe mes koordinatores së komisionit të Lëvizjes Vetëvendosje Dejona Mihali dhe ish-shefit të KEK-ut, Nagip Krasniqi, ku Mihali e fton atë në një takim në selinë e Lëvizjes Vetëvendosje, por i thotë të mbajë kapele.

Partitë opozitare kanë thirrur tri seanca të jashtëzakonshme në dy javët e fundit, por që janë bojkotuar nga partia në pushtet, Lëvizja Vetëvendosje dhe partnerët e koalicionit qeverisës.

Lajmi i plotë në sistemin me parapagim.