Nemajna Radivojeviq me nofkën "Gandi" dhe Vladimir Radivojeviq me nofkën "Mami", janë dy serbët që terroristi Milan Radojiciq ka angazhuar për të realizuar sulme në veri, tha të martën në konferencë për media kryeministri Albin Kurti.

Por kush janë dy personat që kryeministri Kurti tha se kanë marrë pjesë në agresionin në Banjskë të Zvecanit.

KosovaPress mëson se Vladimir Radivojevic, i njohur me nofkën “Mami” konsiderohet si njëri nga personat më me ndikim dhe të besueshëm të Milan Radoicic.

I njëjti ka lidhje të shumta me politikanë serbë dhe me grupe të ndryshme kriminale që kanë operuar në veri të vendit. Është anëtarë i ekipit të tifozëve “Delije” nga Zveçani, punonjës i MTS në Mitrovicë të veriut, si dhe akter i shumë ngjarjeve të dhunshme në veri të vendit.

Nemanja Radivojevic - “Gandi” në anën tjetër, është caktuar nga Milan Radoicic, si personi kryesor në aspektin operativ të veprimit në terren.

Burime të KosovaPress-it bëjnë të ditur se gjatë barrikadave të muajit dhjetor 2022 në veri të vendit, ai ka qenë personi kyç për transportin dhe shpërndarjen e armatimit tek personat e besueshëm të tij.

I njëjti është duke qëndruar në Kopaonik të Serbisë dhe në vazhdimësi, edhe përmes rrjeteve sociale, ka kërcënuar në forma të ndryshme, për veprime të dhunshme në veri të vendit tonë.

https://kosovapress.com/kurti-sulmi-ne-iber-lepenc-rrezikoi-sigurine-nacionale-dhe-paralizimin-e-jetes-ekonomike

Ndryshe, kryeministri Albin Kurti tha të martën se bazuar në informacionet e inteligjencës, Milan Radoçiq ka caktuar dy persona të afërt të tij për të realizuar sulme në veri përmes grupeve të tyre.