Kryeministri Albin Kurti ka përgëzuar të gjithë popullin shqiptar kudo që ata janë me rastin e festave të Nëntorit.

Ai gjatë ditës ka qëndruar për vizitë në Vlorë, me rastin e 111-vjetorit të shpalljes së pavarësisë së Shqipërisë, ndërsa në orët e mbrëmjes do të vizitojë Prekazin legjendar të komandantit Adem Jashari.

“Katër ditë historike në një datë që na ka përcjellë historikisht. Nga Skënderbeu më 1443 në Krujë, te Ismail Qemali më 1912 në Vlorë, deri te ditëlindja e Adem Jasharit më 1955 në Prekaz e në fund dalja e parë publike e Ushtrisë Çlirimtare të Kosovës më 1997 në Llaushë. 28 Nëntorin e kemi festë të katërfishtë me të cilën lartësojmë fitoren, bashkimin, flamurin, pavarësinë, trimërinë, dhe lirinë.

Nga Vlora sot paradite e tani drejt Prekazit në mbrëmje, gëzuar gjithë shqiptarëve 111-vjetori i pavarësisë së Shqipërisë”, ka shkruar Kurti në Facebook.