Kryeministri Albin Kurti u ka bërë thirrje pesë shteteve mos njohëse në Bashkimin Evropian që ta njohin pavarësinë e Kosovës.

Kurti ka thënë se mosnjohja përbën cenim për sigurinë e kontinentit evropian. Para deputetëve të Kuvendit të Kosovës, Kurti ka thënë se do të përshpejtojnë procesin për aplikim në Bashkimin Evropian dhe Këshill të Evropës.

Shefi i ekzekutivit ka thënë se pesëshja mos njohëse e BE-së duhet të njohë urgjentisht pavarësinë e Kosovës, në mënyrë që të mos lejohet përdorimi i preteksteve false për të nxitur ndarje dhe konflikte në Evropë.

“U bëjmë thirrje pesë shteteve mos njohëse brenda Bashkimit Evropian, Spanjës, Sllovakisë, Rumanisë, Greqisë dhe Qipros, që të njohin këtë realitet e të vërtetë duke njohur urgjentisht pavarësinë e Kosovës, në mënyrë që të mos lejohet përdorimi i preteksteve false dhe analogjive të paqëndrueshëm për të nxitur ndarje e konflikte në Evropë. Pavarësia e Kosovës është një rast që merr parasysh padrejtësinë shekullore, okupimin, luftën dhe gjenocidin e Serbisë mbi popullin tonë, është në përputhje me të drejtën e popullit tonë për vetëvendosje dhe siç është vulosur në Gjykatën Ndërkombëtare të Drejtësisë në përputhje me të drejtën ndërkombëtare. Në dritën e këtij agresioni duhet kuptuar se mosnjohja e pavarësisë së Kosovës përben cenim për sigurinë e kontinentit evropian”, ka thënë Kurti.

Kurti ka thënë se Kosova do të kërkojë që sa më parë të bëhet anëtare e NATO-s.

“Vitin e kaluar ne bëmë të ditur se do të aplikojmë për anëtarësim këtë vit për BE, këtë proces do ta përshpejtojmë njëjtë siç do të përshpejtojmë aplikimin për anëtarësim në Këshill të Evropës dhe mekanizmat të tjerë ndërkombëtar. Njëkohësisht do të kërkojmë që Kosova të bëhet sa më shpejt anëtare e NATO-s duke filluar së pari me partneritetin për paqe”, ka thënë Kurti.

Derisa ka dënuar sulmet e Rusisë ndaj Ukrainës, kryeministri i Kosovës ka thënë se i dënojnë edhe veprimet e Serbisë, e cila nuk i ka vënë sanksione Rusisë.

“Ne e dënojmë edhe mos dënimin e agresionit rus nga fqinji ynë verior Serbia dhe mos vënien e sanksioneve. Pozicioni edhe-edhe duke tentuar të luajë qendrën e dyfishtë edhe më Moskën edhe me Brukselin, edhe me Uashingtonin edhe me Pekinin është pozicion edhe me autokracinë edhe me demokracinë. Por ndaj  agresionit të Rusisë e pushtimit të Ukrainës nuk mund të ketë neutralitet për vende kandidate për anëtarësim në Bashkim Evropian kur i gjithë Bashkimi Evropian e dënon dhe sanksionon fuqishëm. Pra qartazi dhe të vendosur, secili duhet ta dënojë invazionin rus dhe agresionin ushtarak”, ka thënë Kurti.

Kurti ka thënë se askush nuk duhet të rrijë indiferent në një situatë tillë. Ai ka shtuar se sulmi ndaj Ukrainës është sulm ndaj botës së civilizuar, lirisë dhe demokracisë.