Kurti: Prekazi me Epopenë e UÇK-së u shndërrua në kryeqytet të kryengritjes shqiptare
Lexohet për: 2 min.
1 vit më parë
Linku u kopjua
Pas pjesëmarrjes në ceremoninë shtetërore të ngritjes së flamurit dhe homazheve në Vlorë, në 111-vjetorin e shpalljes së Pavarësisë së Shqipërisë, kryeministri Albin Kurti ka bërë homazhe sonte në Prekaz, te Kompleksi Memorial “Adem Jashari”.
Duke kujtuar flijimin, sakrificën dhe çmimin për lirinë të cilën e gëzojmë, kryeministri Kurti tha se ndaj saj duhet të sillemi me përgjegjësi institucionale e qytetare.
“Prekazi me Epopenë e UCK-së është shndërruar në kryeqytet të kryengritjes shqiptare dhe këtu ne e kuptojmë se sa i lartë ka qenë flijimi, sakrifica, çmimi për lirinë, të cilën e gëzojmë e ndaj të cilës duhet të sillemi me përgjegjësi institucionale e qytetare”, tha Kurti.
Kurti tha se për çdo 28 Nëntor kujtojmë jo vetëm Skënderbeun në Krujë, flamurin kombëtar dhe çlirimin arbëror nga shekulli 15, jo vetëm Ismail Qemalin në Vlorë dhe pavarësinë e Shqipërisë, por gjithashtu edhe datëlindjen e kryekomandantit Adem Jashari dhe njëkohësisht shpalljen publike të Ushtrisë Çlirimtare të Kosovës.
