Kryeministri i Kosovës Albin Kurti ka thënë se vrasja e Liridona Ademajt ishte kryer me paramendim dhe kishte ndodhur vetëm pse ishte grua, teksa ka kërkuar dënim maksimal për autorët e këtij krimi makabër.

Kurti në një postim në Facebook ka shkruar se gratë dhe vajzat po vazhdojnë të vriten, ndërsa “normat shtypëse patriarkale ende janë të shpërndara gjerë”.

“Arrestimi i kriminelëve nuk po mjafton. Barra e padrejtësive të sistemit të drejtësisë vazhdon të bie mbi supet e grave dhe vajzave, përderisa kryesit e krimeve nuk marrin dënime meritore”, ka shkruar Kurti.

“Urdhërdhënësi, dorasi dhe bashkëpunëtori në vrasjen e Liridonës duhet të ndëshkohen dhe ta marrin dënimin maksimal. Kjo bëhet me një sistem prokurorial e gjyqësor efektiv dhe të vetëdijshëm për detyrën e lartë shoqërore që bartin”, ka shkruar Kurti.

Si gënjeu Naim Murseli për vrasjen e bashkëshortes së tij Liridona Ademajt - KosovaPress

Duke përkujtuar se dhimbja për këtë krim të tmerrshëm është e madhe, Kurti thotë se për të parandaluar krime të ngjashme makabre duhet të angazhohen të gjithë dhe se vetëm në këtë mënyrë do të mund të zhduket “kultura patriarkale e mizogjene dhe maskulinitetin e dhunshëm e toksik”.

“Qytetarët e Republikës presin nga zyrtarët publikë që punojnë (apo kanë punuar) në institucionet shtetërore se duhet të jenë shembull pozitivë e progresivë në shoqëri për sjelljen e tyre ndaj partnerëve dhe në familje e jo kriminelë a mujsharë që besojnë se ia dalin”, përfundon Kurti.

Ndryshe, Naim Murseli, bashkëshorti i Liridona Ademajt, si organizator i vrasjes, dorasi Granit Plava dhe Kushtrim Kokalla, pjesëtar i FSK-së, kanë dalë sot në seancën fillestare në Gjykatën Themelore në Prishtinë, e cila ka vendosur nga një muaj paraburgim për secilin prej tyre.