Pas katër vjet studime diplomoi gjenerata 2023 e kadetëve të Qendrës për Studime Universitare, duke i shtuar Forcës së Sigurisë së Kosovës edhe 15 oficerë të rinj. Në ceremoninë e diplomimit, kryeministri i vendit, Albin Kurti, deklaroi se Kosova nuk e forcon ushtrinë për të sulmuar të tjerët, por për të qenë mjaftueshëm e fortë në mbrojtjen e vetvetes.

Kurti u tha oficerëve që Forca është ndërtuar mbi themelet e Ushtrisë Çlirimtare të Kosovës dhe që e njëjta në një të ardhme të afërt do të jetë pjesë e NATO-s.

"Për dy vite janë rekrutuar 1 mijë e 240 ushtarë të rinj, në proces të rekrutimit janë edhe 612 ushtarë të rinj dhe 388 rezervë. Me 2240 ushtarë më shumë brenda dy viteve radhët e Forcës tonë janë shtuar për 83%. Ne nuk e forcojmë ushtrinë për t'i sulmuar të tjerët por për të qenë mjaftueshëm të fortë për të mbrojtur vetveten, për një Kosovë më të sigurt, me të drejtë e më të barabartë për të gjithë”, tha ai.

Ndërsa komandant i QSU-së, major Albion Ajvazi, u rikujtoi të diplomuarve përgjegjësinë e madhe që kanë tani e tutje, derisa u shpreh krenar për angazhimin e tyre të deritanishëm.

E në emër të klasës 2023, kadeti Arianit Hoxha, e siguroi komandantin se do të jenë gjithmonë të gatshëm për zbatimin e detyrave.

Ai theksoi se gjithmonë do të kenë në mendje sakrificat e dëshmorëve dhe të rënëve për lirinë e vendit.

Në ceremoni padyshim nuk mungoi as ekzekutimi i drillit ceremonial nga garda ceremoniale e kadetëve.

Ndërsa në fund të saj, ushtarakët u betuan para komandantit të QSU-së ndërsa morën edhe diplomat të cilat u ndanë nga kryeministri Albin Kurti, ministri i Mbrojtjes, Armend Mehaj si dhe komandanti i FSK-së, gjenerallejtënant Bashkim Jashari.

Lajmi i plotë është në sistemin me parapagim.