Prishtinë, 10 dhjetor – Në kuadër të festimeve të 25-vjetorit të themelimit të saj, IPKO Telecommunications sot ka dhuruar bursat për 25 studentë të shkëlqyer nga fusha e inxhinierisë dhe telekomunikacionit. Kjo bursë do të mbështesë zhvillimin e tyre profesional dhe do të kontribuojë në avancimin e rrugëtimit të tyre akademik.

Në këtë përvjetor historik, IPKO ka vendosur të theksojë angazhimin e saj për rininë dhe inovacionin, duke mbështetur këta studentë të talentuar që do të jenë pjesë e transformimit të industrisë në të ardhmen.

Përmes këtij programi, IPKO synon të fuqizojë të rinjtë në Kosovë duke u ofruar mundësi për t’u zhvilluar dhe për të dhënë kontributin e tyre në fushën e teknologjisë dhe telekomunikacionit. Ky program bursash është një prej mënyrave të shumta me të cilat IPKO ka kontribuar në zhvillimin e të rinjve të Kosovës, duke u ofruar mundësi për t’u zhvilluar dhe për të kontribuar në përparimin e fushës së teknologjisë dhe telekomunikacionit.

"Sot, në përvjetorin tonë të 25-të, ne mbështesim këta 25 të rinj të shkëlqyer, të cilët janë liderët e së ardhmes në teknologji dhe telekomunikacion. Me këto bursa, ne nuk po kontribuojmë vetëm në financimin e studimeve të tyre, por po investojmë në të ardhmen e Kosovës dhe të sektorit që formëson të ardhmen e vendit," tha Andras Pali, CEO i IPKO Telecommunications. "Ky është një hap i rëndësishëm për të ndihmuar brezin e ri të ndjekë ëndrrat e tij dhe të bëjë ndryshime të mëdha në shoqëri, dhe ne do të jemi gjithmonë krah tyre në këtë rrugëtim,"- shtoi z.Pali.

Këto iniciativa pasqyrojnë përkushtimin e IPKO-s për të qenë më shumë se një ofrues shërbimesh telekomunikacioni: ato theksojnë rolin e saj si një aktor kyç në pasurimin e jetës së individëve dhe komunitetit në të gjithë Kosovën. Me fokus në inovacion dhe shërbim të shkëlqyer ndaj klientëve, IPKO vazhdon të udhëheqë dhe formësojë sektorin e telekomunikacionit, duke nxitur lidhjen dhe mundësitë për të gjithë.

Ky vit është po ashtu një mundësi për të shprehur falënderimet e thella ndaj klientëve të IPKO për besnikërinë dhe mbështetjen e paçmuar që kanë dhënë gjatë këtyre 25 viteve. Si lider në industrinë e telekomunikacionit, IPKO vazhdon të udhëheqë me risitë dhe shërbimet e shkëlqyera që ofron për klientët e saj.

IPKO, 25 vjet bashkë me ty!