Kryeministri i Kosovës, Albin Kurti, ka thënë se vizitat e zyrtarëve shtetëror në veri të vendit nuk janë kundër askujt, andaj shtoi se duhet të lihen anash çfarëdo paragjykim nga secili. Ai theksoi se në veri po bëhen investime që nuk janë bërë në dy dekadat e kaluara, derisa tha se mbyllja e komunave paralele në veri ishte e domosdoshme për t’i hapur rrugë rritjes së shërbimeve publike të ligjshme për qytetarët në veri. Ndërkaq, akuzoi Serbinë se është për mbyllje dhe kufizim, siç u dëshmua javën e kaluar me mbylljen e rrugëve në pikë kalimet kufitare me Kosovën.

Kurti para kabinetit qeveritar të mërkurën duke folur për vizitën e tij të djeshme në veri, tha se e njëjta është e domosdoshme për të kuptuar nevojat që katër komunat veriore i kanë.

Ai përmendi shërbimet që pritet të hapen në veri, derisa nënvizoi se të njëjtat do t’i ofrojnë qytetarët.

Sipas tij, Serbia është për mbyllje dhe kufizim, siç u pa edhe javën e kaluar me mbylljen e rrugëve në Serbi në pikë kalimet kufitare me Kosovën.