Në kujtim dhe në nderim të sakrificës dhe të gjakut të derdhur për liri, kryeministri Albin Kurti ka bërë homazhe sot te varrezat e martirëve e dëshmorëve të kombit në Çabrat të Gjakovës. I shoqëruar nga anëtarë të kabinetit qeveritar dhe deputetë të Kuvendit të Kosovës, kryeministri Kurti takoi familjarët e dëshmorëve dhe martirëve në Gjakovë. Kurti tha se Gjakova ka dhënë shumë në çdo luftë e posaçërisht në luftën e fundit, ku janë 361 dëshmorë dhe 1022 martirë. “Vetëm në ditët ndërmjet 7 dhe 11 majit 1999, i kemi 26 dëshmorë dhe mbi 100 martirë. Vrasjet e fëmijëve, pleqve, grave, burrave, rejave e të rinjve, këto varreza ku sheh njeriu pa numër mbiemra të njëjtë të familjeve, tregojnë që Serbia ka ushtruar gjenocid në Kosovë dhe ka pasur për qëllim shfarosjen e shqiptarëve. Por ajo ka dështuar në këtë projekt mizor e antinjerëzor të saj, dhe sot 25 vjet më vonë ne jemi më të fortë e më të fuqishëm se kurrë më parë”, tha Kurti.
Ai shprehu mirënjohje familjeve që po qëndrojnë të fortë dhe mbajnë lart krenarinë e popullit shqiptar, i cili në fund doli fitimtar dhe synon rrugën e integrimeve euro-atlantike. "Ushtria Çlirimtare e Kosovës, invalidët dhe veteranët e luftës, familjet e dëshmorëve, janë vlera të pamohueshme të shtetit e të kombit tonë, mbi të cilat ne vazhdojmë që të ndërtojmë të ardhmen tonë të ndritshme për brezat që do të vijnë. E ku ka shembull më të mirë për këtë se sa nipi i Lule Sharanit, Dijari, i cili kur u takuam këtu tha që dëshiron të angazhohet në Forcën e Sigurisë së Kosovës, në ushtrinë e Republikës sonë," tha Kurti.
