Kryeministri Albin Kurti është zotuar se do të bëjmë revitalizimin e disa linjave hekurudhore, reduktimin e qeseve dhe shisheve të plastikës dhe menaxhimin e mbeturinave të rrezikshme. Krahas integrimit në BE, Kurti ka folur edhe për rëndësinë e ndalimit të degradimit të natyrës. Në ceremoninë e “Karta për Komunën e gjelbër dhe të qëndrueshme”, shefi i ekzekutivit tha se niveli qendror e lokal duhet të zbatojë agjendën e gjelbër për Ballkanin Perëndimor.

Në shënimin e Ditës së Tokës, kryeministri Albin Kurti tha se qytetet janë kthyer në ngjyrë hiri, e të tillë e kanë edhe ajrin.

"Në ndërtimin e së ardhmes, në gjetjen e zgjidhjeve për të luftuar ndryshimet klimatike, të gjithë e kemi një rol të veçantë. Niveli i qeverisjes qendrore dhe lokale, qytetarët, ndërmarrjet dhe qeverisjet lokale, duhet që të gjithë të koordinohemi së bashku. Jemi bashkë në zbatimin e agjendës së gjelbër për Ballkanit Perëndimor dhe në përmbushjen e objektivave për zhvillim të qëndrueshëm të vendosura për vitin 2030 dhe zotimet e dakorduara në konferencën e 36 të OKB-së mbi ndryshimet klimatike, COP 26. Krahas aspektit të rëndësishëm të procesit tonë të integrimit në BE, veçanërisht kemi nevojë të ulim gradualisht degradimin e natyrës dhe nivelet e emetimeve”, ka deklaruar Kurti.

Ai shtoi se janë ndërmarrë disa hapa për një të ardhme më të qëndrueshme të furnizimit me energji të ripërtritshme. Kurti tha se nevojitet një rishikim i thellë i qasjes së shfrytëzimit të burimeve dhe rimendim i hapësirës publike.

“Sipas vlerësimit të fundit të bërë nga Agjencia për Mbrojtjen e Mjedisit të Kosovës, emetimet mesatare të gazrave serrë në Kosovë janë vlerësuar rreth 10 milionë tonë dioksid-karboni ekuivalent. Përtej numrave këto vlera janë thirrje për ndërmarrë veprime të guximshme dhe radikale për mbrojtjen e diversitetit, ruajtjen e burimeve tona natyrore dhe zhvillimin e ekonomisë së qëndrueshme. Për të ndihmuar në uljen e këtyre numrave dhe implementimin e agjendës së gjelbër, qeveria përmes mbështetjes së politikave të qëndrueshme do të përmirësojë performancën ekonomike, nxitjen e sektorëve të ri të biznesit duke mundësuar krijimin e vendeve të reja të punës”, ka shtuar ai.

Ai është zotuar edhe për rivitalizimin e disa linjave hekurudhore.

“Në kuadër të planifikimit buxhetor për vitin 2022 dhe të rejat që planifikohen në të ardhmen, kemi për synim rivitalizimin e linjave hekurudhore Prishtinë-Fushë Kosovë, Fushë Kosovë-Pejë dhe Klinë-Prizren. Reduktimin e qeseve dhe shisheve të plastikës, menaxhimin e mbeturinave të rrezikshme dhe dekomisionimin e azotikut si dhe ndërtimin e stacioneve transfer dhe qendrave të riciklimit në qendra të mëdha”, theksoi Kurti.

Me nënshkrimin e kartës për komunën e gjelbër dhe të qëndrueshme, Kurti shtoi se komunat do të përfitojnë mbështetje financiare e profesionale në dizajnimin e politikave të zhvillimit urban, social dhe ekologjik.

Raportuesja për Kosovës në Parlamentin Evropian, Viola Von Cramon ka theksuar rëndësinë e agjendës së gjelbër për Ballkanin Perëndimor.

"Agjenda e gjelbër ka një potencial vërtetë transformues. Është strategjia e re për rritjen e Kosovës dhe gjithë rajonin që kalon nga një model tradicional në një ekonomi të qëndrueshme. Agjenda e gjelbër nuk mund të zbatohet ende, por me një sinergji, bashkëpunim të sinqertë dhe punë të ndërsjellët të gjitha niveleve të qeverisjes, është e rëndësishme që të gjithë në qeveri në Prishtinë dhe nivel lokal, përkatësisht nga përkatësia politike, preferencave partiake të punojnë së bashku për zbatimin e kësaj karte. Dua ta shoh Kosovën si shembull të transformimit të gjelbër në rajon”, ka thënë ajo.

Përfaqësuesi special i qeverisë federale gjermane për Ballkanin Perëndimor, Manuel Sarrazin tha se Kosova varet nga qymyri, e cila shkakton ndotjen e ajrit.

“Duhet ende shumë punë për t’u bërë dhe ne duhet të arrijmë synimet tona së bashku ju. Ne duhet të përshpejtojmë për të arritur objektivat klimatike të Evropës të rënë dakord në Paris. Ne duhet të bëjmë më shumë furnizim për qytetarët tanë me burime të qëndrueshme dhe të përballueshme. Ne po e shohim rritjen e çmimeve për shkak të luftës dhe duhet të punojmë për sigurinë energjetike, jo vetëm në rajonin tuaj por edhe në Gjermani”, theksoi ai. 

E,koordinatorja për zhvillimin e Kombeve të Bashkuara në Kosovë, Ulrika Richardson u shpreh se slogani i Ditës së Tokës duhet të jetë investimi në planet.

“Është një iniciativë e shkëlqyeshme dhe natyrisht edhe për komunat. Komunat janë ato ku ndodhin gjërat dhe mundësuesi i politikave dhe prioriteteve dhe gjithashtu kornizave më të mira legjislative. Kemi mirëpritur dhe është e rëndësishme që të bazohemi në disa iniciativa që janë duke u bërë... Duhet të mirëpresim edhe vendimin e Kosovës që të bëhet një komision i cili do të mundësojë koordinimin dhe kohezionin e këtyre iniciative. Ka shumë gjëra që po bëhen në Kosovë të cilat mund të përshpejtohen dhe bazohen në mënyrë që të bëjmë këtë iniciativë që të ndodhë dhe të ketë një start dinamik të suksesshëm”, ka thënë Richardson.

Dita e Tokës ka për qëllim angazhimin e të gjithëve në mbrojtje të tokës, mbrojtjen e planetit dhe resurseve të saj nga ndotja.