Trajneri i mirënjohur i xhudos kosovare, Driton Kuka, ka reaguar përmes një statusi në Facebook, ku përveç reflektimeve mbi vlerat dhe sportin, ka dërguar edhe një mesazh të qartë politik lidhur me situatën në vend.

Ai e ka nisur mesazhin me një metaforë simbolike, duke theksuar se vlerat e vërteta nuk maten me poste apo pozita në sport, pasi sipas tij ato “vijnë e shkojnë”, ndërsa ajo që mbetet janë njerëzit dhe identiteti. Por theksi kryesor i reagimit të tij ka qenë kërkesa që Kosova të mos shkojë sërish në zgjedhje.

Në fund të statusit, Kuka ka apeluar drejtpërdrejt ndaj vendimmarrësve që të shmangin një proces të ri zgjedhor, duke theksuar se qytetarët janë të lodhur dhe se frustrimi po rritet nëse vendi përballet sërish me zgjedhje. Mesazhi i tij ka nxitur reagime të shumta në rrjetet sociale, duke e kthyer këtë postim në një debat më të gjerë për situatën politike në vend.

“Mos na dërgoni në zgjedhje o njerëz se populli o lodh, kuptoni se frustrimi po rritet nëse ndodhin zgjedhjet prapë!”, ka shkruar Kuka.

KosovaPress