Emërimi i Andrea Pirlos në krye të Kombëtares së Italisë është vënë në pikëpyetje pas polemikave që lidhen me angazhimin e tij si ambasador global i kompanisë ruse të basteve Fonbet, duke krijuar tensione edhe në drejtimin e Federatës Italiane të Futbollit (FIGC).

Sipas raportimit të La Gazzetta dello Sport, drejtori teknik i Italisë, Paolo Maldini, e ka përzgjedhur Pirlon si pasues të trajnerit të larguar, me synimin për të nisur një cikël të ri pas dështimit të tretë radhazi të “Azzurrëve” për t'u kualifikuar në Kupën e Botës. Megjithatë, presidenti i FIGC-së, Giovanni Malagò, ka kërkuar verifikime shtesë mbi lidhjet e Pirlos me kompaninë Fonbet dhe me presidentin e United FC, Sergey Lomakin.

Raporti thekson se Malagò ka shqyrtuar edhe mundësinë e rikthimit te kandidatët Antonio Conte dhe Roberto Mancini, por Maldini nuk ka pranuar alternativa. Sipas tij, Italia ka nevojë për një trajner që do të ndërtojë një projekt afatgjatë, ndërsa Conte dhe Mancini nuk përputhen me këtë vizion.

Po sipas medias italiane, Maldini kishte pranuar postin vetëm pasi kishte marrë garanci se do të kishte fjalën kryesore në përzgjedhjen e trajnerit të ri. Për këtë arsye, nëse emërimi i Pirlos dështon, nuk përjashtohet mundësia që edhe vetë Maldini të tërhiqet nga detyra.

Në këtë situatë rol të rëndësishëm mund të luajë Leonardo, i cili aktualisht është këshilltar i projektit. Ai mund të shërbejë si ndërmjetës mes palëve në rast se negociatat për Pirlon nuk përfundojnë me sukses. Sipas raportimeve, Pirlo është duke negociuar ndërprerjen e marrëdhënies së tij me United FC, në përpjekje për të eliminuar pengesat që po vonojnë emërimin e tij në stolin e Italisë.

KosovaPress