Krasniqi: Procesi zgjedhor po shkon mirë, qytetarët ta shfrytëzojnë të drejtën e tyre
Lexohet për: 2 min.
6 muaj më parë
Linku u kopjua
Ministri i Administrimit të Pushtetit Lokal, Elbert Krasniqi u ka bërë thirrje qytetarëve që të marrin pjesë në votimin e sotëm për pro ose kundër shkarkimit të kryetarëve në katër komunat veriore në Leposaviq Zubin Potok, Zveçan e Mitrovicë të veriut.
Sipas tij, ky proces zgjedhor po shkon mirë dhe sigurt. Kështu u shpreh ai pas vizitës në qendrën e votimit në Soqanicë.
Ai tha se ka filluar me vizitat në disa nga hapësirat që po organizohet votimi.
Krasniqi theksoi se Lista Serbe dëshiron monopolin mbi politikën e serbëve në Kosovë.
Kryetarët e komunave janë palë në ketë proces, shton Krasniqi, teksa thekson se është me rëndësi se qeveria ka hapur mundësi që qytetarët të shprehin vullnetin e tyre.
Sipas udhëzimit administrativ, Krasniqi tha se nuk do të organizohet një votim tjetër për 12 muaj të ardhshëm, në rast se nuk do të ketë votues të mjaftueshëm në këtë proces zgjedhor.
Në këtë qendër votimi në Soqanicë ka votuar zëvendësministri për Komunitete dhe Kthim, Radojica Radomiroviq. /Sh.Pajaziti