Kryetari i Partisë Demokratike të Kosovës (PDK) Memli Krasniqi ka shprehur serish shqetësimet e tij lidhur me masat ndëshkuese të Bashkimit Evropian ndaj Kosovës, duke thënë se një gjë e tillë po e dëmton mirëqenien e qytetarëve të vendit.

Ai gjatë një takimi sot me shefin e Zyrës së Bashkimit Evropian në Kosovë, Tomas Szunyog ka diskutuar mbi zhvillimet e fundit politike në vend dhe perspektivën evropiane të Kosovës.

“Ambasadorit Szunyog i shpreha shqetësimin në lidhje me vazhdimin e masave të BE-së kundër Kosovës, të cilat po dëmtojnë mirëqenien e qytetarëve tanë”, ka shkruar Krasniqi në Facebook.

Për PDK-në, ka shtuar ai, integrimi euro-atlantik është i pa alternativë dhe rruga e vetme përpara.

Ndryshe, për shkak të tensioneve në veri të Kosovës dhe mosveprimi i qeverisë për të shtensionuar situatën, BE-ja vendosi masa ndëshkuese ndaj Kosovës.

Situata në veriun e Kosovës u  përkeqësua pasi serbët lokalë në komunat në veri të Kosovës, Zveçan, Leposaviq dhe Zubin Potok, kundërshtuan hyrjen e kryetarëve të rinj shqiptarë, me ndihmën e Policisë së Kosovës, në ndërtesat komunale.

BE i kërkoi Kosovës të pezullojë operacionet policore, të bëhet  zhvendosja e kryetarëve shqiptarë të komunave në zyra alternative dhe të shpallen zgjedhjet e parakohshme me pjesëmarrje të pakusht të serbëve të Kosovës.

Zyrtarë të BE-së kanë përsëritur, se heqja e masave ndëshkuese ndaj Kosovës do të varet nga zbatimi i obligimeve që ka marrë Prishtina dhe hapat e tjerë që priten nga autoritetet në Kosovë për vazhdimin e përpjekjeve për të ulur tensionet në veri.

Masat penalizuese ndaj Kosovës përfshijnë pezullimin e përkohshëm të punës së trupave të krijuara në bazë të Marrëveshjes së Stabilizim Asociimit (MSA), mos ftesën e Kosovës në takime të nivelit të lartë dhe pezullimin e vizitave dypalëshe.

Masat e tjera përfshijnë edhe ndaljen e programimit të fondeve për Kosovën nga IPA 2024 (Instrumentet e Para-Anëtarësimit) si dhe propozimet e Kosovës në kuadër të Kornizës së Investimeve në Ballkanin Perëndimor nuk janë dorëzuar për shqyrtim nga bordi më 29 dhe 30 qershor.

Masat e BE-së dhe agresioni në veri “trembin” investitorët e huaj - KosovaPress

Eurodeputeti gjerman: Masat e BE-së nuk janë fer, s’është dashur t’i vihen Kosovës - KosovaPress

Osmani: Kosova po e respekton marrëveshjen e Bratislavës, masat e BE-së dëmtojnë dialogun - KosovaPress

FMN: Nëse masat e BE-së mbesin gjatë në fuqi do të jenë pengesë për zhvillimin ekonomik - KosovaPress

​Masat e BE-së, Rafuna: Pasoja në ekonomi, po dëmtohet imazhi në sytë e investitorëve të huaj - KosovaPress