Qeveria e Kosovës ka ashpërsuar sanksionet ndaj Rusisë dhe Bjellorusisë në raport me situatën në Ukrainë. Ky vendim u mor në mbledhjen e sotme të ekzekutivit kosovar.

Ministrja e Punëve të Jashtme dhe Diasporës, Donika Gërvalla u shpreh se ky vendim është në kuadër të zbatimit të pakos të 11-të të sanksioneve të BE-së për Rusinë dhe Bjellorusinë.

Sipas saj, këto masa përfshijnë forcimin e bashkëpunimit dypalësh dhe shumë palësh me vendet e treta për të penguar anashkalimin e sanksioneve, ndalimin e transitit të mallrave dhe teknologjisë përmes Rusisë, shtrëngimin e kufizimeve të eksportit, etj.

Zëvendëskryeministrja Gërvalla tha se vendosja e sanksioneve të reja karshi Rusisë dëshmon përkushtimin e Kosovës për drejtësi dhe paqe në botë.

Krahas sanksioneve të reja për shtetin rus e bjellorus, kabineti qeveritar miratoi edheraportin 6 mujor të buxhetit për vitin 2023.

Ministri i Financave, Punës dhe Transfereve, Hekuran Murati tha se pranimet për 6 mujorin e parë arritën vlerën prej 1 miliard e 330 milionë euro, që sipas Muratit, shënon rritje.

Ekzekutivi kosovar miratoi edhe koncept dokumentin për Odën Ekonomike të Kosovës.

Ministrja e Industrisë, Ndërmarrësisë dhe Tregtisë, Rozeta Hajdari deklaroi se përmes këtij koncepti synohet mbrojtja e interesave të bizneseve dhe shoqatave që përfaqësojnë ato.

Qeveria e Kosovës mori vendim edhe për hartimin e programit për Reforma Ekonomike 2024-2026. Sipas ministrit të Financave, Punës dhe Transfereve, Hekuran Murati ky program është pjesë e dialogut për politika ekonomike dhe financiare ndërmjet Kosovës dhe BE-së.

Qeveria e Kosovës në mbledhjen e sotme ka miratuar edhe Bordin e ri drejtues të Fondit të Sigurimeve Shëndetësore. Bordin e ka prezantuar në mbledhjen e Qeverisë ministri i Shëndetësisë Arben Vitia dhe ka në përbërje po ministrin e Shëndetësisë, Arben Vitia, Hekuran Nikçi kryeinspektor i Punës, Besnik Fetahu nga Ministria e Financave, Kastriot Meça nga Oda e Profesionistëve Shëndetësorë, Ardian Shefkiu nga ShSKUK, Izet Sadiku nga Asociacioni i Komunave të Kosovës dhe Afrim Maliqi nga Shoqata e Pacientëve.

Ekzekutivi kosovar sot ka miratuar edhe draftin e Programit Kombëtar të Shkencës 2023-2028, i cili ka objektiv zhvillimin e kapaciteteve njerëzore dhe ato të infrastrukturës në Kosovë për kërkime shkencore dhe inovative.

Qeveria e Kosovë sot ka rialookuar 900 mijë euro për Ministrinë e Administrimit të Pushtetit Lokal (MAPL) për 13 projekte kapitale në 13 komunat e Kosovës që synojnë zhvillimin e infrastrukturës socio-ekonomike.

Qeveria miratoi edhe kërkesën e MAPL-së për dhënien në shfrytëzim të pronave të kërkuara nga komuna e Ferizajt dhe ajo e Dragashit.

Po ashtu, janë rialookuar 160 mijë euro edhe Ministrinë Zhvillimit Rajonal për 3 projekte kapitale në komunat e Dragashit, Ferizajt dhe Shtimes.

Në mbledhjen e sotme kabineti qeveritar mori vendim për themelimin e Komisionit Kombëtar për Refugjatë. Ministri për Komunitete dhe Kthim, Nenad Rashiq adresoi kërkesë për një anëtar nga kjo ministri në këtë Komision.

Krahas këtyre vendimeve, sot Qeveria e Kosovës aprovoi edhe koncept-dokumentin për fushën e mjedisit si dhe atë të ujërave.

Lajmi i plotë në sistemin me parapagim.