Kombëtarja e Kosovës në grupmoshat U15 ka shënuar fitore në ndeshjen miqësore kundër Shqipërisë U15.

“Dardanët” e rinj, të cilët në përbërje ishin futbollist të gjeneratës së vitit 2008, dhe të përzgjedhur nga projekti “Elite Youth Development U15” shënuan fitore me rezultat 2:1 kundër Shqipërisë U15, përcjell KosovaPress.

Ndeshja u zhvillua në stadiumin “Kukës Arena”, ku të parët në epërsi kaluan futbollistët e Shqipërisë, me golin e realizuar nga Blini, në minutën e 15’.

Por, rezultatin për skuadrën e Ilir Nallbanit e barazoi Rin Ahmeti në minutën e 27’, i cili shënon për 1:1, rezultat ky me të cilin u mbyll pjesa e parë.

Në vazhdim Kosova e nisi më mirë ndeshjen, kur Rin Ahmeti depërtoi në zonë dhe përfitojë një penallti, të cilën në gol e shndërroi Enkel Ramiqi.

Ndeshjen e dytë miqësore këto dy ekipe e zhvillojnë të shtunën po ashtu në Kukës, ndërsa janë të vlefshme për testimin e lojtarëve, që në të ardhmen do të jenë pjesë e ekipit kombëtar.