Kosova është renditur në vendin e 84-të nga 180 shtete në Indeksin Botëror të Lirisë së Shtypit për vitin 2026, duke shënuar një përmirësim të dukshëm krahasuar me vitin paraprak, kur mbante pozitën e 99-të, transmeton KosovaPress.

Sipas raportit të Reporterëve pa Kufij, megjithëse vendi ka një treg mediatik të larmishëm dhe dinamik, zhvillimi i tij mbetet i kufizuar për shkak të madhësisë së vogël të tregut. Sipas raportit, liria e medias vazhdon të përballet me sfida të shumta, përfshirë ndërhyrjet politike në rregullim, paditë strategjike kundër pjesëmarrjes publike (SLAPP), qasjen e kufizuar në informacion publik dhe rreziqet për sigurinë e gazetarëve.

Raporti thekson se sektori televiziv në Kosovë është i përqendruar dhe dominohet nga kanalet private, ndërsa transmetuesi publik RTK vazhdon të luajë një rol të rëndësishëm. Në të njëjtën kohë, media online ka shënuar zhvillim, duke përfshirë edhe platforma që publikojnë në më shumë gjuhë.

Raporti vë në pah rritjen e padive SLAPP dhe zbatimin e dobët të ligjeve, veçanërisht në lidhje me qasjen në dokumente publike dhe të drejtat e autorit. Ndërsa në aspektin politik, raporti thekson se gazetarët vazhdojnë të përballen me presion dhe sulme, pavarësisht rolit të tyre në mbajtjen e përgjegjshme të institucioneve.

“Rregullatori joefektiv i medias, Komisioni i Pavarur i Mediave (KPM), iu nënshtrua një reforme ligjore që u vlerësua si jokushtetuese nga Gjykata Kushtetuese. Para zgjedhjeve të përgjithshme në fillim të vitit 2025, disa media private u përballën me bojkot nga qeveria, e cila po ashtu kërcënoi pavarësinë e transmetuesit publik RTK... Mediat në gjuhën serbe përballen me sfidën shtesë të një tregu të vogël, ku disa media varen nga financimi nga Serbia fqinje, ndërsa mediat e pavarura nuk do të mund të mbijetonin pa financim ndërkombëtar” thuhet në raport.

Në aspektin ekonomik, thuhet se mediat varen kryesisht nga reklamat e sektorit privat, por shpesh mbështeten edhe nga burime politike apo komunale, “duke rritur rrezikun e ndikimit editorial”. Mediat në gjuhën serbe përballen me sfida shtesë për shkak të tregut të kufizuar dhe varësisë nga financime të jashtme.

Raporti trajton edhe aspektin socio-kulturor, ku gazetarët gëzojnë një nivel të caktuar besimi në shoqëri, por shpesh janë objekt i fyerjeve dhe dezinformimit në rrjetet sociale, si dhe i akuzave politike dhe ideologjike.

/Kosovapress/