Kryetari i Kuvendit të Kosovës, Glauk Konjufca ka thënë se Bashkimi Evropian po dëshiron me zor t’ia marrë kompetencat Kosovës për hartimin e draft-statutit të Asociacionit të komunave me shumicë serbe. Kryeparlamentari theksoi se mbështetë idenë që drafti i Asociacionit i propozuar nga Bashkimi Evropian, të dërgohet në Gjykatën e Venecias, ide të cilën e paraqiti kryeministri Albin Kurti.

Konjufca tha se janë të gatshëm të diskutojnë me BE-në, se kur duhet të jetë gati drafti i Asociacionit, por që hartimi i tij të bëhet nga autoritetet e Kosovës.

Duke folur për raportet ndërmjet kryeministrit Albin Kurti dhe presidentes Vjosa Osmani, kryeparlamentari tha se s’ka asgjë dramatike në relacionet mes tyre dhe se marrëdhëniet janë të mira.

Ai shtoi se krerët institucional mund të ketë dallime në qëndrime për çështje të ndryshme, mirëpo kur dalin para bashkësisë ndërkombëtare janë të një qëndrimi.

Sa i përket audio-incizimit, ku dëgjohet shefja e grupit parlamentar të LVV-së, Mimoza Kusari-Lila duke biseduar me terroristin, Milan Radojiçiq, kryeparlamentari tha se s’ka asnjë dyshim se e njëjta ka bërë ndonjë tradhti kombëtare, mirëpo veprimin e saj e ka quajtur si pakujdesi.

Ai u shpreh i tronditur dhe i çuditur se si edhe pas nëntë muajve nga sulmi në Banjskë, “nuk ka ende asnjë veprim nga drejtësia për Milan Radojiçiq.

Këto komente Konjufca i bëri pas mbledhjes së Kryesisë së Kuvendit të enjten./KosovaPresss/