Komuna e Shtimes ndan 100 bursa për 100 studentë
Kryetari i Komunës së Shtimes, Qemaj Aliu ka njoftuar se kjo komunë ka ndarë 100 bursa për studentët e këtij vendi.
Sipas tij, nga komuna e Shtimes deri më tani për studentë janë ndarë 24 bursa, kurse tash ky numër është rritur në 110.
Aliu, ka shpërndarë edhe një video në profilin e tij në rrjetin social Facebook, ku në mbishkrim ka shkruar se është krenari e jashtëzakonshme shpërndarja e 100 bursave për 100 studentë tanë të mrekullueshëm.
I pari i Shtimes u ka uruar suksese të gjithë studentëve, duke thënë se do t’i kenë krahë në këtë mision të përbashkët.
“Jemi të lumtur dhe ndjehemi mirë, se nga 24 bura që i kemi gjet në komunën tonë që shpërndaheshin për studentët më të mirë të komunës sonë tashmë kemi arrit në 100. Ne e dimë sa e rëndësishëm është kjo kategori shoqërore sidomos studentët. Studentët janë elita e shoqërisë. Nga ju në të ardhmen pritet të dalin kuadro prej të cilëve do të udhëhiqet qyteti, por edhe shteti”, ka thënë ai.
