Në Komisionin për Arsim, Shkencë, Teknologji, Inovacion, Kulturë, Rini dhe Sport është miratuar projektligji për provimin e maturës shtetërore.

Në bazë të këtij projektligji, do të ndryshojë mënyra e mbajtjes dhe kushtet provimi të maturës, do të fuqizohet komisioni shtetëror si dhe do të rregullohen kundërvajtjet dhe shkeljet e mundshme gjatë zhvillimit të këtij testimi.

Propozimin e këtij projektligji e bëri Ministrja e Arsimit, Arbërie Nagavci, për të cilin tha se ky projektligj do të ndryshojë cilësinë dhe do të rrisë rezultatet e provimit shtetëror.

Projektligjin e prezantuar nga Ministrja Nagavaci, e ka përkrahur edhe deputeti i Lëvizjes Vetëvendosje, Jahja Kokaj, njëherësh anëtar i këtij komisioni, i cili tha se duhet të shtohet vigjilencë në përdorimin e teknologjisë nga maturantët, sepse për ata është shumë lehtë  për të kaluar testin pa dije.

Ndërkaq, Arijeta Rexhepi, anëtare e Komisionit për Arsim theksoi se duhet të analizohet përqindja e cila merret për bazë si rezultat i maturantëve për pranim në shkolla profesionale.

Edhe kryetari i Komisionit për Arsim, Ardian Gola, tha se duhet të rivlerësohet shpërndarja e përqindjeve të shkollës, testit dhe ato të testit pranues duhet të shpërndahen në një mënyrë më të saktë.

Sipas tij, këtu është pika kyçe e zgjidhjes së problemit të rezultatit final.

Projektligji për testin e maturës i prezantuar nga Ministrja Nagavci është votuar nga të gjithë deputetët e opozitës dhe pozitës, pa asnjë votë kundër.