Partia Demokratike e Kosovës (PDK) nuk ka votë për Vjosa Osmanin. Shefi i deputetëve të kësaj partie, Arian Tahiri, tha se vendit nuk i bën nder dikush për president që ka pasur qasje të njëanshme dhe është propozim i një grupi politik, raporton KosovaPress.

Ai, në një prononcim për media të enjten, tha se nëse s’ka pajtueshmëri për zgjedhjen e të parit të vendit, janë të gatshëm për zgjedhje të reja.

Mandati i presidentes Vjosa Osmani përfundon më 4 prill 2026. Sipas Kushtetutës së Kosovës, një president i ri duhet të zgjidhet jo më vonë se 30 ditë para përfundimit të mandatit të presidentit aktual, që do të thotë deri më 4 mars 2026. Nëse nuk zgjidhet presidenti deri në këtë periudhë, vendi shkon automatikisht në zgjedhje të reja.

“Nuk është se po dua të lëshohem me emra të përveçëm. Vendit nuk i bën nder dikush që ka pasur qasje të njëanshme dje dhe që e përfaqëson vetëm një grup apo subjekt, por po flasim për dikë që është mbi partitë politike”, tha ai.

Një ditë pasi anëtarë të familjes Jashari thanë se s’kanë vullnet për të marrë postin e presidentit, Tahiri tha se PDK-ja e mbështet për president dikë që e përfaqëson unitetin politik dhe atë qytetar.

“Vendit i bën nder dhe PDK-ja e mbështet dikë që nuk e përfaqëson vetëm një parti politike. Nuk e përfaqëson veç pozitën apo veç opozitën, por dikë që e përfaqëson edhe pozitën, edhe opozitën dhe qytetarët që realisht nuk e votojnë presidentin direkt. Dikush që ka kontribute dhe është intelektual dhe i bën nder shtetit dhe qytetarëve të Kosovës. Vazhdojmë me mbet brenda këtyre qëndrimeve, në kuptim të asaj që me diskutua në parim dhe standard se kush do të duhej t’i plotësonte këto atribute për t’u bërë president i vendit. Ende nuk është faza që kemi folur në emra të përveçëm. Vullneti i PDK-së është me kontribua në interes të institucioneve të vendit dhe shoqërisë, por nëse nuk mundet me u zgjedh dikush dhe s’ka me pas disponim prej forcës kryesore politike, PDK-ja është e gatshme me shkua në zgjedhje”, tha ai.

Shefi i Grupit Parlamentar të PDK-së tregoi edhe nëse do të ketë kandidat për president të propozuar nga partia e tij.

“Nuk është se ka pasur diskutime për marrëveshje politike. Çështja e marrëveshjes politike ka përfundu, ajo i kish ra kur është formuar qeveria. PDK-ja nuk është e interesuar për marrëveshje politike, por është e interesuar me pasur qasje proaktive dhe mbështetëse për institucionet. Nëse është e nevojshme, arsyeshme dhe kërkohet, padyshim se PDK-ja do të nxjerrë edhe një emër”, shtoi Tahiri.

Derisa kanë mbetur edhe gjashtë ditë afat për zgjedhjen e presidentit, ai nuk tregoi nëse do të ketë takime të tjera mes Bedri Hamzës dhe kryeministrit Albin Kurti.

“Për pjesën e kohës dhe takimeve nuk është se jam kompetent dhe me informacion”, përfundoi Tahiri.

Vjosa Osmani është e vetmja që ka shprehur ambiciet për të kandiduar për një mandat tjetër pesëvjeçar. E njëjta, për të zyrtarizuar kandidaturën, duhet të mbledhë tridhjetë nënshkrime të deputetëve. Madje, për t’u thirrur seanca e Kuvendit për zgjedhjen e presidentit, duhet të ketë dy kandidatë të zyrtarizuar me nga 30 nënshkrime të deputetëve të Kuvendit. /E.Zeqiri/

/Kosovapress/