Gjykata Themelore në Drenas ka dënuar me burgim prej 4 muajve Eqrem Avdullahut nga Rahoveci, i cili akuzohet për veprën penale “kanosje”, ndaj kryetarit të Organizatës së Veteranëve të Luftës së UÇK-së, Hysni Gucati.

Në seancën përfundimtare, gjyqtari tha se i akuzuari dënohet edhe me shumën prej 70 euro, derisa palet mund të ankohen për vendimin.

Gjyqtari Shefqet Baleci, gjatë shpalljes së aktgjykimit, tha se i akuzuari Eqrem Abdullahu është fajtor për kanosjen e Hysni Gucatit përmes rrjetit social Facebook, me qëllim të shkaktimit të frikësimit dhe ankthit. Sipas vendimit të gjykatës, Abdullahu është dënuar me katër muaj burgim, të cilin do ta vuajë 15 ditë pas plotfuqishmërisë së aktgjykimit, si dhe është obliguar të paguajë shpenzimet procedurale dhe kompensimin për viktimat e krimit.

“I akuzuari Esian Abdullahu është fajtor, sepse përmes rrjetit social Facebook, me qëllim të shkaktimit të frikësimit dhe ankthit, seriozisht e kishte kanosur të dëmtuarin Hysni Gucati. Në një fan-page në rrjetin social Facebook me emrin ‘Diaspora në Krye’, kishte postuar një foto të të dëmtuarit me mbishkrimin: ‘Këtij derri duhet pushkatuar’. Me këtë rast, të dëmtuarit i ka shkaktuar frikë, ankth dhe pasiguri për jetën e tij. Gjykata të akuzuarin Esian Abdullahu e gjykon me dënim me burg në kohëzgjatje prej 4 muajsh, të cilin do ta mbajë 15 ditë pas plotfuqishmërisë së këtij aktgjykimi, si dhe detyrohet të paguajë shpenzimet procedurale dhe kompensimin për viktimat e krimit.”, u shpreh Baleci.

Hysni Gucati, pas vendimit të gjykatës ndaj personit që e kishte kërcënuar, tha për media se e respekton vendimin e marrë.

“Çdo vendim që merr gjykata unë pajtohem, kështu është vendim i gjykatës. Katër muaj burg efektiv është mirë, që t’u mblidhen mendtë të gjithë atyre të tjerëve që të kenë kujdes në rrjetet sociale, të mos shkruajnë pa fakte dhe pa argumente. Nuk ka fakte e argumente pse me e fyer një njeri apo një person pa nevojë. Për mua, pajtohem me gjyqtarin dhe ishalla u mblidhen mendtë njerëzve dhe nuk merren me njerëz”, u shpreh Gucati.

Ai bëri të ditur se ka edhe raste të tjera të iniciuara në gjykatë ndaj personave që, sipas tij, e kanë kërcënuar.

“Kam edhe diku 16-17 padi që i kam bërë ndaj tyre, nga qytete të ndryshme, Gjermani, Zvicër. Shumica janë jashtë vendit”, tha Gucati.

I pyetur se si e vlerëson mosprezencën e tij në gjykatë, Hysni Gucati tha e ka ndjer vetën fajtor.

Avokati i Hysni Gucatit, Halim Shala, i pyetur se pse gjatë seancës ka insistuar të dihet nëse dikush e ka shtyrë të akuzuarin për ta bërë kërcënimin, tha se nuk kanë pasur dyshime, por kërkesa ka qenë për shkak të moshës së të akuzuarit.

Sipas Prokurorisë, Avdullahu kishte kërcënuar përmes rrjetit social Facebook kryetarin e Organizatës së Veteranëve të Luftës së UÇK-së, Hysni Gucati.

Sipas aktakuzës, ekziston dyshimi i bazuar mirë se më 3 qershor 2026, rreth orës 13:10, i pandehuri Eqrem Avdullahu, përmes llogarisë së tij në Facebook, ka kanosur seriozisht Hysni Gucatin, duke i shkaktuar frikë, ankth dhe pasiguri për jetën.

Në aktakuzë thuhet se në një faqe në Facebook me emrin “Diaspora në Krye” ishte postuar një fotografi e Hysni Gucatit me mbishkrimin “Prokuroria heton Hysni Gucatin - mori rrogë për 19 vite si sekretar shkolle pa shkuar në punë”.

Sipas Prokurorisë, më pas i pandehuri, përmes profilit të tij personal në Facebook me emrin “Eqrem Avdullahu”, kishte komentuar: “Këtë derr duhet pushkatu”.

/Kosovapress/