Kryeministri britanik Keir Starmer dha dorëheqje nga kjo pozitë, të hënën, duke hapur rrugën që Britani të bëhet me një shef të ri qeverie, i cili do të jetë i shtati në pak më shumë se një dekadë.

Starmer njoftoi se po largohet edhe nga posti i liderit të Partisë Laburiste në pushtet, por do të mbetet kryeministër në detyrë deri sa partia të zgjedhë një udhëheqës të ri.

Andy Burnham, i cili fitoi një zgjedhje të posaçme parlamentare javën e kaluar, konsiderohet favoriti kryesor për ta zëvendësuar Starmerin në krye të laburistëve. Burnham, i cili deri javën e kaluar ishte kryetar i Greater Manchester, kishte hyrë në garë me synimin për ta sfiduar Starmerin për drejtimin e partisë dhe të vendit. Ai pritet të zyrtarizohet se deputet i parlamentit britanik, të hënën.

Starmer kishte siguruar një fitore bindëse në zgjedhjet e përgjithshme të vitit 2024, por,siq raporton AP,  një sërë gabimesh gjatë qeverisjes dëmtuan ndjeshëm besueshmërinë e tij.

Njoftimi erdhi pas presionit në rritje brenda partisë për t’ia dorëzuar drejtimin një figure të re që mund të rikthente mbështetjen për qeverinë.

“Pyetja që partia ime po shtron tani është nëse unë jam personi më i përshtatshëm për ta udhëhequr drejt zgjedhjeve të ardhshme të përgjithshme”, tha ai, gjatë një deklaratë të shkurtë, në fund të së cilës iu drodh zëri. “Kam dëgjuar përgjigjen e grupit tonë parlamentar për këtë pyetje dhe e pranoj atë me dinjitet”, transmeton AP, përcjellë KosovaPress.

Ndër reagimet e para për largimin e tij ishte nga BE-ja. Presidentja e Komisionit Evropian, Ursula von der Leyen, vlerësoi trashëgiminë politike të Starmerit pas njoftimit për dorëheqjen.

“Mund t’u duhen shumë liderëve vite për t’u shndërruar në burrështetas, ndërsa ju e arritët këtë brenda vetëm dy vjetësh”, shkroi ajo në platformën X. “Siguria evropiane dhe ajo e Ukrainës janë më të forta falë jush. Faleminderit, i dashur Keir”.