Nga të shtënat me armë zjarri në Lupç të Podujevës, kanë mbetur katër persona të lënduar nga anëtarët e familjes Hoxha dhe Menxhiqi, prej tyre njëri është në rrezik për jetën.

Mjeku kujdestar në Klinikën Emergjente në QKUK, Agron Çitaku theksoi se gjendja e dy të plagosurve në Podujevë është më e rëndë, kurse njëri prej tyre është në rrezik për jetë. Sipas tij, të plagosurit tjerë, kanë gjendje stabile.

Ndërkaq sa i përket të lënduarit me gjendje të rëndë i cili është i moshës mbi 50 vjeçare, pritet së shpejti të hyjë në operim.

“Për momentin njëri mund të themi se është në rrezik të tjerët besoj lëshohen pas trajtimit. Gjendja e tyre për momentin është stabile. Njëri përgatitet me hy në sallë e të tjerët do të pranohen në repart. Dy janë të rinj dhe dy tjerë janë në moshë më të shtyrë mbi 50 vjet. Gjendje më të rëndë janë ata më të vjetrit”, tha Çitaku.

Për këtë rast, Policia për Rajonin e Prishtinës kanë thënë për KosovaPress se deri janë tre persona të plagosur si pasojë e të shtënave me armë zjarri në Lupç, derisa një tjetër ka marrë lëndime pasi është sulmuar me thikë.

“Sot rreth orës 16:00 kemi marrë informatën për të shtëna me armë zjarri në fshatin Lupç të Podujevës. Menjëherë pas marrjes së informatës policia ka dalë në vendin e ngjarjes  dhe ka ndërmarrë të gjitha veprimet e nevojshme. Bazuar në të dhënat e deritanishme  në këtë rast janë plagosur nga arma e zjarrit tre persona, ndërsa një person ka pësuar lëndime nga arma e ftohtë (thikë). Hetuesit policor në koordinim me prokurorinë, po ndërmarrin  veprimet hetimore për  ndriçimin e plotë të rastit”, thotë zëdhënësja e Policisë për Rajonin e Prishtinës, Flora Ahmeti për KosovaPress.