Inspektorati Policor i Kosovës ka hetuar 257 punonjës policorë gjatë vitit 2022, derisa ka arrestuar 108 prej tyre në dyshimet për përfshirje në veprimtari penale.
Kryeshefi i Inspektoratit Policor, Kushtrim Hodaj, në raportimin në Komisionin Parlamentar për Siguri të martën, tha se vitin e kaluar kanë pranuar rreth 1700 ankesa, ku 66 për qind prej tyre i kanë adresuar për hetim disiplinor në Polici, kurse 34 për qind për hetim penal.
“Kemi shumë raste në hetim, sigurisht për rezultatet dhe epilogun e tyre njoftoheni në momentin e duhur. Ka të gjitha niveleve, ne kemi arrestuar dhe të kaluarën. Tash ka të niveleve të ndryshme, ka informacione për të përfshirë në veprimtari të ndryshme kriminale”, shtoi ai.
Në anën tjetër, nga deputetët opozitarë u ngritën shqetësime për rekrutimin në njësitin e specializuar Mbrojtja e Afërt.
Ai pyeti kryeshefin e IPK-së se a ka pasur ndikim politika në këtë rast.
Në lidhje me këtë rast reagoi edhe deputeti i PDK-së, Rashit Qalaj, i cili tha se moscertifikimi i zyrtarëve policorë për arsye banale në mbrojtjen e afërt është humbje e madhe për Policinë e Kosovës.
Ai tha se IPK-ja ka rekomanduar që zyrtarët që rekrutohen për njësitin Mbrojta e Afërt të kenë edhe certifikatën e sigurisë të lëshuar nga AKI-ja, ku bëhet verifikimi i hollësishëm i të kaluarës.
Në bazë të kësaj ai tha se kanë mundur të diskualifikohen disa prej kandidatëve.
