Shefi i Zyrës së Bashkimit Evropian (BE) në Kosovë, Tomas Szunyog gjatë ditës së sotme është takuar me kryetarin e Komunës së Gjakovës, Ardian Gjini, me të cilin kanë biseduar për projektet që financon BE dhe ndihmën që po jep ky donator për të ndihmuar në zhvillimin e këtij qyteti.

Pas takimit, Szunyog ka vizituar edhe objektin komunal në ndërtim, ku nga afër ka parë punën që është duke u zhvilluar aty. Ndërsa, vizita tij ka vazhduar duke vizituar bizneset; një pasiçeri, një biznes i vogël, rrobaqepësi, ku ambasadori ka diskutuar për punën dhe sfidat që po hasin këto biznese.

Szunyog derisa ka treguar për qëllimin e projekteve, ka thënë se do të bëjnë gjithçka që është e nevojshme për t'u siguruar që ndërtesa e komunës së re të përfundojë këtë vit.

"Ne kemi inauguruar një nga projektet më të mëdha këtu për ngrohjen qendrore dhe jam i kënaqur që janë disa aktivitete në kompaninë e ngrohjes që në fakt këtë vit do të ishin edhe kjo ... e energjisë elektrike në fakt nga ky impiant, në mënyrë që të jetë një përmirësim i mëtejshëm i modelit të biznesit të kompanisë. Jam pak i mërzitur që sot nuk mund ta përurojmë ndërtesën e re të komunës sepse shpresoja që kjo do të ishte një çështje dhe një pjesë e vizitës sime këtu, por ne prapë do ta vizitojmë, e kuptoj që ndërtesa është pothuajse e përfunduar dhe ne të dyja palët do të bëjmë gjithçka që është e mundur për t'u siguruar që kjo të përfundojë këtë vit. Pra, përsëri, bashkëpunim shumë i rëndësishëm, një projekt i madh dhe dua të falënderoj kryetarin e komunës për bashkëpunimin e mirë gjatë qëndrimit tim, dhe jam i sigurt se do të ketë bashkëpunim të vazhdueshëm edhe për pasardhësin tim", ka thënë ai.

Ndërsa, ka vlerësuar aktivitetin e komunës në lidhje me komunitetin joshumicë.

"Një çështje e rëndësishme që dua të përmend gjithashtu është se ne gjithashtu vlerësojmë aktivitetet e komunës në lidhje me komunitetet joshumicë, dhe përgëzova kryetarin e komunës që në fakt u votua vitin e kaluar si një lloj kryetari më miqësor për komunitetin rom, dhe unë mendoj se është me të vërtetë e rëndësishme, por diskutuam edhe çështjen e strehimit për viktimat e dhunës në familje dhe me bazë gjinore. Pra, mendoj se përsëri është e rëndësishme që komuna po e mbështet strehimoren dhe se së bashku me qeverinë do ta përmirësojmë këtë dhe do të sigurohemi që të ketë një hapësirë të sigurt për viktimat e dhunës në familje dhe dhunës me bazë gjinore", shtoi Szunyog.

Ambasadori po ashtu ka falënderuar kryetarin Gjini si një partner të mirë për projektet e BE-së.

Falënderues për përkrahjen e vazhdueshme nga BE, është shprehur kryetari i kësaj komune, Ardian Gjini.

Ai derisa ka falënderuar Bashkimin Evropian për mbështetjen, duke theksuar se populli i Kosovës duhet të jetë mirënjohës për mbështetjen e pa rezervë të BE-së. Gjini ka përmendur edhe dy projektet më të mëdha që janë financim i BE-së.

"BE është donatori më i madh në Gjakovë, por edhe në gjithë Kosovën, mirëpo komuna jonë ka përfituar shumë projekte të ndryshme. Dy që janë më të mëdha, ngrohëtorja e re me biomasë, e cila është financim pothuajse i plotë nga BE, me participim të komunës që është më modest. Po ashtu, e kemi edhe objektin e ri të komunës, që në pjesën dërmuese financim i BE-së, por edhe shumë projekte tjera të cilat janë më të vogla, por shumë të vlefshme për komunën tonë. Populli i Kosovës duhet me qenë mirënjohës, populli i Gjakovës është mirënjohës për këtë mbështetje të parezervë që kemi pas deri tash", ka thënë Gjini.

Falënderues ndaj ndihmës së Bashkimit Evropian janë shprehur edhe qytetarët e kësaj komune.

• 

• 

• 

•